Atyraý oblysynda jasandy bógetterdi jara bastady
ATYRAÝ. KAZINFORM — Uly Jem ózeni arnasyn burý úshin jasandy bógetterdi jarý jumystary qolǵa alyndy. Bul týraly Atyraý oblysy ákimdiginiń baspasóz qyzmeti habarlady.
Qazirgi ýaqytta Uly Jem ózeni eldi mekenge qaýip tóndirmes úshin, qarǵyn sýdyń deńgeıin túsirý óte ózekti másele bolyp otyr. Osy rette Jemniń boıynda ornalasqan jasandy bógetterdi jarý arqyly sýdyń arnasyn burý jumystary bastaldy, — delingen habarlady.
Atyraý oblysy ákiminiń orynbasary Qaırat Nurtaev jaýapty mamandarmen birge júrip jatqan jumystarǵa aerovızýaldy tekserý júrgizdi.
— Jylyoıǵa tóngen qaýipti seıiltý maqsatynda Jem ózeniniń saǵalaryn ashyp jatyrmyz. Bul mańda kezinde kóptegen jeke sharýa qojalyqtar sýdy jınap alý maqsatynda aǵys kózin bitep, jasandy bógetter turǵyzǵan. Bul qalaǵa kelgen sýdyń aǵyspen aǵyp ketýine úlken kedergi bolyp otyr. Soǵan baılanysty bitelgen arnalardyń kózin bógetterdi jarý arqyly ashyp jatyrmyz. Ony trotılmen jaryp, ózen kedergisiz aǵyp jatyr, — dedi Q.Nurtaev.
Eske sala ketelik, budan buryn tasqyn sýdyń qaýpine baılanysty Jylyoı aýdanynda tótenshe jaǵdaı jarııalandy.
Kúndiz Qulsarydan Dossorǵa deıingi joldyń bir bóligin sý basty.
5 sáýir kúni tasqyn sý Qulsary qalasyna kire bastaǵanyn habarlaǵan bolatynbyz.
Beıneý aýdanyna Mańǵystaý oblystyq aýrýhanasynyń dárigerleri medıtsınıalyq kómek kórsetýge arnaıy bardy.
Sondaı-aq Beıneý aýdanynda Qulsarydan kelgen 2,5 myń adam ornalasyp úlgerdi. Aqtaý qalasynda da sýdan zardap shekken Qulsary turǵyndary úshin evakýatsııalyq pýnkt ashyldy.
Sonymen qatar Mańǵystaýda azyq-túlik qory jetkilikti ekenin resmı oryndar málimdedi.
Sý basý kezinde Qulsarydaǵy aýrýhanadan 77 naýqasty Mańǵystaý oblysyna jetkizdi.
Búgin Qulsaryda 28 myńnan astam adam qaýipsiz jerge kóshirildi.
