Atyraý oblysynda jaǵalaýǵa 2,7 mln qum toltyrylǵan qap tóseldi

ATYRAÝ. KAZINFORM – Atyraý oblysynda tasqyn sýdan qorǵaý úshin sý aıdyndarynyń jaǵalaýyna 2,7 mln qum toltyrylǵan qap tóseldi.

Atyraý oblysynyń ákimi Serik Shápkenov jedel shtabtyń jıynyn ótkizip, tasqyn sýǵa qarsy jumysty kúsheıtýdi tapsyrdy. Ákimniń aıtýynsha, tasqyn sýǵa baılanysty eki túrli pikir qalyptasyp otyr. 

«Qazir sýdyń múldem kelmeıtini týraly jaǵymdy pikir bar. Alaıda, qaýipti jaǵdaıǵa soqtyrýy múmkin ekeni de aıtylyp jatyr. Jergilikti atqarýshy organdardyń mindeti – barlyq jaǵdaıǵa daıyn bolý. Birinshiden, Batys Qazaqstan oblysyndaǵy jaǵdaıdy eskere otyryp, turǵyndar arasynda túsindirý jumysyn kúsheıtý qajet. Turǵyndarda eger sý kelse, naqty qandaı qadamdar jasaý kerektigi týraly túsinik bolýy kerek. Ekinshiden, Jaıyq ózeniniń boıyndaǵy qaýipti tustarǵa taǵy da muqııat taldaý júrgizgen jón. Atyraý qalasynda ǵana emes, Mahambet jáne Inder aýdandarynda da qajetti sharalardy qabyldaý qajet. Úshinshiden, salynyp jatqan bógettiń sapasy men tyǵyzdyǵyna nazar aýdarý qajet. Mamandar qajetti ólsheý men synaqtardy júrgizip, osal tustaryn anyqtaýy kerek. Eger tasqyn sý álsiz jer tapsa, myńdaǵan atyraýlyqtyń, kompanııalardyń, jergilikti atqarýshy organdardyń orasan zor eńbegi zaıa bolmaq», - dedi Serik Shápkenov. 

Oblys ákimdigi baspasóz qyzmetiniń málimetine súıensek, eldi mekenderdi tasqyn sýdan qorǵaý úshin 512,2 shaqyrym bóget salý josparlanǵan. Qazir 462,88 shaqyrymǵa bóget salý jumysy jalǵasyp jatyr. Jaǵalaýǵa qum toltyrylǵan 2,7 mln-nan astam qap tóselgen. Bul jumystarǵa 15 264 adam, 1 745 tehnıka tartylǵan. 

Máselen, 21 sáýirge deıin 221,1 shaqyrym bóget turǵyzylǵan. Oǵan mekemelerdiń 1496 qyzmetkeri men 3 myńǵaǵa jýyq erikti, 993 tehnıka jumyldy. 

Serik Shápkenovtiń pikirinshe, arnaıy bólingen ár ýchaskede kezekshilikti uıymdastyrylýy kerek. Kezekshilikti aldyn ala daıyndaýdyń mańyzy zor. 

«Belsendiler, TJD mamandary, ákimdik, polıtsııa ókilderi qatarynan kimniń jáne qaı ýchaskege jaýapty ekeni jóninde aldyn ala tizim jasalýy qajet. Ýchaskelerge baratyn kezekshilerdi barlyq qajettilikpen qamtamasyz etken jón», - dedi Serik Shápkenov. 

Eske sala ketelik, budan buryn Atyraýdaǵy bóget qurylysyna ózge óńirlerden jetkizilgen tehnıkalar tartylǵanyn jazǵan edik. 

Sondaı-aq, úsh myńǵa jýyq sarbaz Jaıyq jaǵalaýynda bóget salyp júrgenin habarlaǵan bolatynbyz.