Atyraý oblysynda zańsyz aınalymnan 4 tonnadan astam balyq tárkilendi
ASTANA. KAZINFORM — Atyraý oblysynda polıtsııa bekire tuqymdas balyqtardyń zańsyz aınalymynyń jolyn kesý jumystaryn jalǵastyryp jatyr, dep jazdy Polisia.kz.
Óńirde brakonerlikpen jáne balyq ónimderiniń zańsyz aınalymymen kúresýge, sondaı-aq Kaspıı aımaǵynyń bıoresýrstaryn qorǵaýǵa baǵyttalǵan «Bekire–2026» jedel-profılaktıkalyq is-sharasy turaqty túrde ótkizilip keledi.
Jýyrda polıtsııa qyzmetkerleri zańsyz aınalymnan 4 tonnadan astam balyq ónimin tárkiledi. Onyń ishinde 911 keliden astam bekire tuqymdas balyq jáne shamamen 1 keli bekire ýyldyryǵy bar. Tárkilengen ónimniń barlyǵy Jaıyq-Atyraý bekire balyq ósirý zaýytyna tapsyryldy.
Іs-shara bastalǵaly zańsyz balyq aýlaý, saqtaý, tasymaldaý jáne satý boıynsha 152 quqyqbuzýshylyq anyqtaldy. Jeti qylmystyq is boıynsha sotqa deıingi tergeý júrgizilýde.
Sonymen qatar zańsyz aýlaýǵa arnalǵan 19 qural men quqyqqa qaıshy áreketterde qoldanylýy múmkin 10 júzý quraly tárkilendi. Budan bólek, polıtsııa ýákiletti organdarmen birlesip turǵyndar men balyq sharýashylyǵy sýbektileri arasynda profılaktıkalyq jáne túsindirý jumystaryn júrgizip jatyr.
Turǵyndarǵa tabıǵatty qorǵaý zańnamasynyń talaptary men balyq ónimderin zańsyz aýlaý jáne aınalymǵa jiberý úshin qarastyrylǵan jaýapkershilik túsindirilýde.
Polıtsııa bul baǵyttaǵy jumystar júıeli túrde jalǵasatynyn jáne eń aldymen ekologııalyq qylmystardyń aldyn alýǵa, eldiń tabıǵı resýrstaryn saqtaýǵa baǵyttalǵanyn atap ótti.
Sondaı-aq azamattardy qorshaǵan ortaǵa uqypty qaraýǵa jáne balyqty zańsyz aýlaý men satýǵa qatysty faktiler týraly quqyq qorǵaý organdaryna dereý habarlaýǵa shaqyrdy.
Buǵan deıin bekire tuqymdas balyq pen ýyldyryq satyp alǵandar qylmystyq jaýapkershilikke tartylatynyn jazdyq.
