Atyraý oblysynda sý tasqynynyń qaýpi áli tolyq seıilmeı tur
ATYRAÝ. KAZINFORM – Atyraý oblysyndaǵy sý tasqynynyń qaýpin seıiltý úshin adam kúshi men arnaıy tehnıkalar qajet.
Atyraý oblysy ákiminiń orynbasary Jasulan Bısembıevtiń málimetine súıensek, tasqyn sýdyń qaýpin seıiltý úshin aýyldar mańynda bóget nyǵaıtylyp jatyr. Oǵan mekemelerdiń qyzmetkerleri men eriktiler tartylǵan.
«Alaıda, sý deńgeıi saǵat saıyn kóterilip, Oıyl ózeniniń boıynda ornalasqan aýyldyq okrýgterge qaýip tóndirip tur. Osyǵan baılanysty qol kúshi men arnaıy tehnıkalar qajet.
Qazir oblystyq jedel shtabtyń jumysy birneshe baǵyt júrgizilip otyr. Birinshiden, oblys ákiminiń orynbasary Qaırat Nurtaev Qyzylqoǵa aýdanyna baryp, tasqyn sýǵa qarsy jumystarǵa basshylyq etýdi qolǵa aldy», -dep habarlady Jasulan Bısembıev.
Ákim orynbasarynyń deregine súıensek, Oıyl ózenindegi sý deńgeıi 2 ese tómendegen. Biraq, ózen jaǵalaýynan asqan sý Qonystaný, Taısoıǵan, Qarabaý aýyldaryna jetken.
«Qonystaný aýylyna bógetti nyǵaıtý jumystary úshin 50 qutqarýshy, 20 erikti, 1,5 myń qap pen qajetti qural-jabdyqtar jiberildi. Taısoıǵan jáne Qarabaý aýyldaryna da 60 qutqarýshy bardy. Jumystar táýlik boıy júrgiziledi», - dep málim etti Jasulan Bısembıev.
Endi Jaıyq ózenindegi sý deńgeıi baqylaýǵa alynǵan.
«Jedel shtab Reseıdiń Orynbor oblysyndaǵy Irıklınsk sý qoımasyndaǵy jaǵdaıdy baqylaýda ustaıdy. Qoldaǵy aqparatqa sáıkes, 1 sáýirde Irıklınsk sý qoımasynan jiberiletin sý kólemi sekýndyna 90-dan 390 tekshe metrge deıin arttyrylǵan. Osyǵan baılanysty oblys ákimi Serik Shápkenov Jaıyq ózeniniń Inder, Mahambet aýdandary men Atyraý qalasyndaǵy jaǵalaýyna ınertti materıaldardy tósep, qum toltyrylǵan qappen bekitýdi tapsyrdy», -deıdi oblys ákiminiń orynbasary.
Onyń málimetinshe, Jylyoı aýdanyndaǵy Jem ózenine de nazar aýdarylyp otyr. Mundaǵy Jem-Aqkıiztoǵaı gıdrobeketindegi sý deńgeıi kúndizgi saǵat 8:00-den 20:00-ge deıin 55 sm-ge kóterilgen. Qazir sý deńgeıi – 3 metr 25 sm.
«Jylyoı aýdanyna oblys ákiminiń orynbasary Marat Mýrzıev bardy. Oblys ákiminiń tapsyrmasymen jergilikti atqarýshy organdy, tótenshe jaǵdaı qyzmetkerlerin, «Embimunaıgaz», «Teńizshevroıl» jáne merdiger kompanııalardy bógetti nyǵaıtý jumysyna jumyldyryldy», - deıdi Jasulan Bısembıev.
Eske sala ketelik, budan buryn Atyraý oblysyndaǵy bir aýdanda tótenshe jaǵdaı jarııalanǵanyn habarlaǵan edik.
Keıin Oıyl ózenindegi sý tasqynyna baılanysty Mııaly aýylynan 559 turǵyn evakýatsııalandy.
Sondaı-aq, Mııaly aýylyna tirelgen sýdyń deńgeıi 1 metr 20 sm qurady.
Oıyl ózeniniń mańynan 7 sharýa qojalyǵy qaýipsiz aýmaqqa kóshirildi.
Mııaly aýylyn tasqyn sýdan qorǵaý jalǵasyp jatqanyn jazǵan edik.
Oıyldyń arnasynan asqan sý Mııaly aýyly mańyndaǵy kópirdi buzyp ketti.
Al, búgin Atyraý oblysyndaǵy Kózdiqara aýylynyń turǵyndaryn evakýatsııalaý bastaldy.
Sondaı-aq, keshe sý tasqynynan Qyzylqoǵa aýdanyndaǵy 8 okrýgke áli de qaýip bar ekenin habarladyq.
