Atyraý oblysynda sý tasqynynan zardap shekkenderden 226 ótinish túsken

ATYRAÝ. KAZINFORM – Atyraý oblysynda sý tasqynynan zardap shekkenderden 226 ótinish túsken.

Atyraý oblystyq kásipkerlik jáne ındýstrııalyq damý basqarmasynyń bólim basshysy Sáttiǵul Sabyrovtyń málimetine súıensek, zalaldy óńirlik komıssııa baǵalaıdy.

«Tabıǵı sıpattaǵy sý tasqynynan Jylyoı jáne Qyzylqoǵa aýdandarynyń nysandary zardap shekti. Onyń ishinde shaǵyn jáne orta kásipkerliktiń nysandary bar. Qazir sý tasqynynan zardap shekkenderden 226 ótinish tústi. Onyń ishinde dúkender men naýbaıhanalardyń, jylyjaılardyń ıeleri bar. Al, basym bóligi sharýa qojalyqtarynyń jetekshileri bolyp otyr. Qazir sý tasqynynan bıznes ıelerine keltirilgen zalaldy baǵalaý úshin óńirlik komıssııa qurylyp jatyr. Bul komıssııa jaqyn arada baǵalaý jumysyn bastaıdy», - dedi Sáttiǵul Sabyrov.

Onyń aıtýynsha, búgin, 22 sáýirde Jylyoı aýdanynda keńes berý ortalyǵy jumysyn bastady. Bul ortalyqta zardap shekkenderge óńirlik komıssııaǵa júginý úshin qandaı qujattar tapsyrý qajettigi jóninde keńes beriledi.

Eske sala ketelik, buǵan deıin Jylyoı aýdanynda 1866 otbasy bir rettik áleýmettik kómek qarjysyn alǵanyn jazǵan bolatynbyz. 

Sondaı-aq, tasqyn sý basqan Qulsaryda «Sergek» kameralary 4 sáýirden beri óshirilip turǵanyn habarlaǵan edik.