Atyraý oblysynda Oıyl ózeniniń sýy jaıylma men saı-jyralarǵa aǵyp jatyr

ATYRAÝ. KAZINFORM – Atyraý oblysyndaǵy Qyzylqoǵa aýdanynyń aýmaǵymen 3 ózen aǵyp ótedi. Bul – Oıyl, Saǵyz jáne Noǵaıty ózeni. 

Atyraý oblysynyń tótenshe jaǵdaı jónindegi jedel shtabynyń málimetinshe, aýdan ortalyǵy – Mııaly aýylynyń tusynda Oıyl ózenindegi sýdyń deńgeıi 2 sáýirde -2 sm tómendegen. Ózendegi sý búgin, 3 sáýirde -6 sm-ge túsip, 556 sm kórsetip tur.

Saǵyz ózeniniń sýy Saǵyz aýylynyń mańynda tómendegeni baıqalǵan. Al Noǵaıty ózenindegi sýdyń deńgeıi birqalypta saqtalyp tur. 

Qyzylqoǵa aýdanynyń ákimi Qanat Ázmuhanovtyń aıtýyna qaraǵanda, tasqyn sýdyń qaýpi tónetin ýchaskeler joq. Ózenderdegi sý arnasymen aǵyp, jaıylym men shabyndyqqa shyǵyp jatyr. 

– Máselen, 28 aqpannan búginge deıin Eraly sý toraby arqyly 250 mıllıon tekshe metrge jýyq sý ótti. Al qazir 3 ózenge sý kelip jatyr. Biraq sýdyń deńgeıi ótken jylmen salystyrǵanda tómen. Oıyl ózeniniń aýdan aýmaǵyndaǵy uzyndyǵy – 276 shaqyrym. Ózenniń taıyzdanyp qalǵan 100 shaqyrym arnasyn tazalaý jumysy júrip jatyr. Eraly sý torabynyń 6 qaqpasynyń bári ashyq tur. Bul toraptan 1 metr 70 sm deńgeıinde sý aǵyp jatyr. Ótken jyly bul kórsetkish 3 metrge jetken edi, - deıdi Qanat Ázmuhanov. 

Ákimniń málimetinshe, sý tasqynynyń aldyn alý maqsatynda ózenderdiń 7 shaqyrym arnasy keńeıtilgen. Bul jumys sý deńgeıi bir qalypqa túskennen keıin qaıta jalǵasady. 

– Eldi mekenderdi sý tasqynynan qorǵaý úshin 54 shaqyrym bóget soǵyldy. Saǵyz aýylynyń ortasymen ótetin Noǵaıty ózeniniń jaǵalaýyna 5 shaqyrym bóget salynyp, 1 shaqyrym arnasy tereńdetildi. Mundaı jumys Saǵyz ózeniniń jaǵalaýynda da júrgizildi. Jalpy tasqynǵa qarsy jumystarǵa 150-ge jýyq adam men 75 tehnıka tartyldy, - dep málim etti Qanat Ázmuhanov. 

Mııaly aýylynyń turǵyny Aıjan Izımovanyń pikirinshe, byltyrǵy sý tasqynynan keıin turǵyndar ózenderdiń arnasyn tazartýdy suraǵan. 

– Turǵyndar byltyrǵy sý tasqyny qaıtalanbaǵanyn qalaıdy. Olardyń bul talabyna sáıkes jumystar atqarylyp jatyr. Ótken jyly kóktemgi tasqyn sý kelgennen keıin aýyldarǵa aýyzsýdy saǵatpen beretin boldy. Osyndaı jaǵdaıdy qaıtalamas úshin 8 tuşy sý uńǵymasy qorshaldy, - deıdi Aıjan Izımova. 

Qyzylqoǵa aýdandyq tótenshe jaǵdaılar bóliminiń bastyǵy Baqtybek Tólegenovtiń deregine qaraǵanda, tasqyn sýdyń qaýpi seıilgen. Degenmen, sý arnalarynyń jaǵalaýyndaǵy bógette baqylaý jalǵasa beredi. 

– Atyraý oblystyq tótenshe jaǵdaılar departamentinen 40-qa jýyq qyzmetker, 5 tehnıka men bir qaıyq kómekke kelip, kezekshilikke tartylǵan edi. Oıyl ózenindegi sý deńgeıiniń tómendeýine baılanysty bul kúsh 2 sáýirde Atyraý qalasyna oraldy. Biraq aýdandyq bólimdegi mamandar «Kenen» kópiri men Qumótkel ýchaskesin jiti baqylap, eki saǵat saıyn aqparat berip otyr, - deıdi Baqtybek Tólegenov. 

Aýdan ákimi Qanat Ázmuhanovtyń aıtýynsha, Mııaly men Jangeldın aýylynyń aralyǵyndaǵy «Kenen» kópirinde júk kólikteriniń júrýine shekteý qoıylǵan. Bul – tasqyn sýdyń qaýpin azaıtý maqsatynda qabyldanǵan sheshim. Aldaǵy ýaqytta atalǵan kópirdiń ornyna jańasyn salý josparlanǵan.

Eske sala ketelik, buǵan deıin Jylyoı aýdanyndaǵy eldi mekenderdi tasqynnan qorǵaý úsh 3 deńgeıli bóget salynǵanyn jazǵan edik.