Atyraý oblysynda kóleńkeli kásipke kimder úıir

ATYRAÝ. KAZINFORM — Atyraý oblysy kóleńkeli ekonomıkanyń úlesi eń tómen óńirler ishinde úshinshi orynda tur.

Atyraý oblysy boıynsha ekonomıkalyq tergep-tekserý departamentiniń shtab bastyǵy Bekbolat Ánesovtiń aıtýynsha, ulttyq ekonomıkanyń damýyna teris áser etetin kóleńkeli kásipke taldaý júrgizilip keledi.

Maqsat — kóleńkeli ekonomıkanyń qanat jaıýyna bóget bolý. 

— Memleket basshysy Qazaqstan halqyna arnaǵan Joldaýynda ekologııa, áleýmettik, ınvestıtsııa, qarjy, taǵy da basqa salalardaǵy ózekti máselelerdi sheshýge baǵyttalǵan tapsyrmalardy atap ótken edi. Osy oraıda kóleńkeli ekonomıkany boldyrmaýǵa basymdyq berdi. Atalǵan tapsyrmany oryndaý maqsatynda agenttiktiń 2023-2025 jyldarǵa arnalǵan kóleńkeli ekonomıkaǵa qarsy kúres jónindegi keshendi jospary jasaldy. Jospardy iske asyrý úshin naqty kórsetkishterdiń ındıkatory naqtylandy, — deıdi Bekbolat Ánesov. 

Onyń deregine súıensek, Atyraý oblysynda baqylanbaıtyn ekonomıkanyń úles salmaǵy 2021 jyly 1,57 paıyzdy quraǵan. Al, 2022 jyly 1,48 paıyzǵa tómendegen.

Eń eleýli tómendeý 2023 jyly 1,19 paıyzǵa jetti. Oń dınamıka ónerkásipte, onyń ishinde karer qazý, qurylys, kólik jáne qoımalaý salasynda baıqalyp otyr.

— Atyraý oblysy boıynsha ekonomıkalyq tergep-tekserý departamenti 2024 jyldyń tamyz aıynda «DELTA» massıvtik ataýy qoıylǵan topty joıdy. Bul top 2023-2024 jyldary tıisti jumysty atqarmaǵan. Biraq, jalǵan shot-faktýrany qoldanyp, salyq tóleýden jaltarý maqsatynda 3 mlrd teńgeden astam aqshany qolma-qol túsirgeni anyqtaldy. Al 2019-2024 jyldary «Atyraý munaı óńdeý zaýyty» JShS-niń burynǵy bas dırektorlary Sh. Danbaı men M.Dosmuratovqa qatysty ókilettigin asyra paıdalaný jáne salǵyrttyq faktileri boıynsha qylmystyq is qozǵaldy. Olar sottaldy. Sh. Danbaı isi boıynsha memleket kirisine 2,9 mlrd teńge óndirildi. Al M.Dosmuratovtan 1,9 mlrd teńge qaıtaryldy, — deıdi Bekbolat Áneov.

Atyraý munaı óńdeý zaýytyna qatysty eń mańyzdy nátıje retinde satyp alatyn qyzmetter men qyzmet qunyna áser etken taýarlar tizbegindegi artyq deldaldar joıylǵanyn aıtýǵa bolady.

Máselen, ENERTEK, NNS LTD, KTR, IQS kompanııalarynyń «AMÓZ» JShS-men baılanysty aýtsorsıng jónindegi sharttary buzylǵan.

Olarǵa zaýyt quramyndaǵy 4 tseh jabdyqpen jáne 1 qyzmetker shtatymen birge berilgen. 

— Osyndaı ónimsiz deldaldardyń jyl saıynǵy tabysy 7 mlrd teńgeden, al paıdalaný kezeńinde 30 mlrd teńgeden astam qarjyny qurady. Munyń bári AMÓZ bıýdjeti arqyly ótip kelgen. Tergeý sheńberinde memleketke № 6 park avtonomdy quıý stantsııasymen AMÓZ boıynsha negizsiz jasalǵan sharttar buzyldy. Múliktik keshender qaıtaryldy. Sotqa deıingi tergeý barysynda memleket paıdasyna quny 2,2 mlrd teńge bolatyn suıytylǵan munaı gazyn saqtaý parkiniń 50% úlesi qaıtaryldy, — dedi departamenttiń shtab bastyǵy. 

Onyń aıtýynsha, Atyraý oblysy jalpy memlekettik reıtıngte kóleńkeli ekonomıkanyń úlesi  tómen óńirler arasynda úshinshi orynda tur.

Munaıly óńirdiń aldynda Astana men Almaty qalasy bar. 

— Kóleńkeli kásipke úıir bolatyndar men ekonomıkanyń damýyn tejeıtin salalarǵa monıtorıng júrgizý jalǵasa beredi. Qazir Atyraý oblysynda kóleńkeli ekonomıka deńgeıine teris áser etetin 2 negizgi baǵyt bar. Máselen, aýyl sharýashylyǵy salasyndaǵy ósim 0,01, al kóterme, bólshek saýdada bul kórsetkish 0,02 paıyzdy qurap otyr, — dep málim etti Bekbolat Ánesov.

Eske sala ketelik, budan buryn Atyraýda bıýdjettik mekeme esepshileri jalaqy aýdarýda nege jıi qatelesetinin habarlaǵan bolatynbyz.