Atyraý oblysynda dala mysyǵy tabıǵı ortaǵa jiberildi
ASTANA. KAZINFORM — «Aqjaıyq» memlekettik tabıǵı rezervatynyń mamandary Atyraý oblysynda turǵynnyń aýlasyna kirip ketken dala mysyǵyn ustap, mekendeıtin jerine qaıta jiberdi.
19 naýryz kúni Atyraý qalasyna qarasty Birlik aýylynda turǵyndardyń biri ózine tıesili taýyq qorasynan jabaıy dala mysyǵyn baıqaǵan.
Oqıǵa týraly aqparat «Aqjaıyq» memlekettik tabıǵı rezervatynyń mamandaryna jedel túrde jetkizildi. Oqıǵa ornyna kelgen mamandar jabaıy janýardy qaýipsiz túrde ustap alyp, oǵan eshqandaı zııan keltirmesten tabıǵı meken etý ortasyna qaıta jiberdi.
Júrgizilgen tekserý nátıjesinde janýardan qutyrý aýrýynyń belgileri anyqtalǵan joq.
Osyǵan baılanysty mamandar turǵyndarǵa jabaıy janýarlardy óz betinshe ustaýǵa áreket jasamaýdy jáne mundaı jaǵdaılarda birden tıisti qyzmetterge habarlasý qajettigin eskertedi.
Aıta ketelik Sharyn ulttyq parkiniń aýmaǵynda fototuzaqqa shıbóri túsip qalǵany týraly jazǵan edik.