Atyraý oblysynda bilim mekemelerindegi qarjy jymqyrý deregi onlaın baqylanady
ATYRAÝ. KAZINFORM – Atyraý oblysynda bilim mekemeleri qarjy jymqyrý deregi onlaın baqylaýǵa alyndy. Bul saladaǵy jemqorlyqty boldyrmaýǵa yqpal etedi.
Sybaılas jemqorlyqqa qarsy is-qımyl agenttiginiń Atyraý oblystyq departamenti basshysynyń birinshi orynbasary Nurlan Jahınniń aıtýynsha, mektep dırektorlary men esepshilerine biryńǵaı býhgalterlik esep júıesiniń prıntsıpteri, yqtımal jymqyrý deregin onaın-baqylaý túsindirilgen.
«Byltyr bilim berý salasyndaǵy sybaılas jemqorlyq táýekelderine syrtqy taldaý júrgizildi. Taldaý kezinde bıýdjet qarjysyn josparlaý jáne ıgerý kezinde pedagogterdiń eńbegine aqy tóleý qorynan qarjy urlaý shemalary ashyldy. Urlyqtyń kóptegen deregine bıýdjettik ótinimderdi qalyptastyrý protsesin avtomattandyrýdyń, buzýshylyqtardyń aldyn alý tetikteriniń, býhgalterlik esep júıesi men memlekettik derekqorlar ıntegratsııasynyń bolmaýy áser etken. Departament tarapynan tıisti organǵa 11 usynys berildi. Sol usynystyń 7-eýi oryndaldy. Al, 4 usynys áli oryndaý satysynda tur», - deıdi Nurlan Jahın.
Onyń aıtýyna qaraǵanda, bıýdjettik ótinimdi qalyptastyrý avtomatty formatqa tolyq aýystyrylǵan. Al, ár mektepte jeke býhgalterlik eseptiń jeke aqparattyq júıelerin satyp alý tájirıbesi toqtatylǵan.
«Jalǵan esepteýlerge jol bermeıtin formatty-logıstıkalyq baqylaýy engizilgen býhgalterlik eseptiń biryńǵaı júıesin ortalyqtandyrylǵan satyp alýǵa aýystyryldy. Bilim ordalarynda «óli jandardy» boldyrmaý maqsatynda qyzmetkerlerdiń kelýin tirkeý júıesin engizý týraly talap reglamentteldi», - dep málim etti Nurlan Jahın.
Bul ádis pedagogterdiń eńbegine aqy tóleý qoryn qarjylandyrý júıesin tolyq qaıta qaraýǵa yqpal etken. Sondaı-aq, jymqyrýdy barynsha azaıtýǵa septigi tıip otyr.
«Endi árbir tólem ashyq júrgiziledi. Elektrondy tólem mindetti túrde óńdeledi. Ony aýdarýdyń zańdylyǵy turǵysynan tıisti baǵa beriledi. Qarjy salasynyń ár qyzmetkerin óz mindetin adal atqarýǵa shaqyramyz», - deıdi Nurlan Jahın.
Eske sala ketelik, budan buryn Atyraýda emhananyń dırektory, bas esepshi men sharýashylyq meńgerýshisi sottalǵanyn jazǵan edik.
