Atyraý oblysynda byltyrǵydaı sý tasqyny qaıtalanýy múmkin be
ATYRAÝ. KAZINFORM – Atyraý oblysynda byltyrǵydaı sý tasqyny bola ma? Oblys ákimi Serik Shápkenovtiń aıtýynsha, aldyna ala baǵalaýǵa sáıkes búgingi ahýal byltyrǵy stsenarıı boıynsha órbip otyr.
Sý tasqynynyń aldyn alý úshin buǵan deıin soǵylǵan bógetter rekonstrýktsııalanyp, qalypqa keltirilip jatyr. Oǵan qajetti qarjy qarastyrylǵan. Materıaldyq-tehnıkalyq rezervter tolyq jınaqtalǵan.
– Jol ınfraqurylymyn qalpyna keltirý aıasynda Úkimettiń rezerv qarjysy men jergilikti bıýdjet esebinen 30 shaqyrym jol jóndelip, 4 kópir qalpyna keltirildi. Jol boıynda 13 mal ótkeli salynyp, buryn sý shaıyp ketken 49 ýchaskege sý ótkizý qubyrlary qondyryldy, - deıdi Serik Shápkenov.
Ákimniń aıtýyna qaraǵanda, Atyraý oblysyndaǵy sý tasqynyna qarsy sharalar aıasynda Jylyoı aýdanyndaǵy Jem ózeni men Qursaı arnasynyń túbin tereńdetý jumystary júrip jatyr. Jobaǵa sáıkes 95 shaqyrym túptiń 80,3 shaqyrymy tereńdetilgen.
– Josparlanǵan 61 shaqyrym bógettiń 29 shaqyrymy soǵyldy. Qyzylqoǵa aýdanynyń 9 aýyldyq okrýgi men 5 eldi mekeninde 41,9 shaqyrym bógetti nyǵaıtý qolǵa alyndy. Inder aýdanynda qoldanystaǵy 34,5 shaqyrymdyq bógettiń qorǵanys qurylystary kúsheıtildi. Mahambet aýdanynda 105 shaqyrym bóget salyndy. Bıyl qosymsha 29,9 shaqyrym bóget nyǵaıtylyp, jańadan 12,4 shaqyrym bóget turǵyzylady, - dep málim etti Serik Shápkenov.
Eske sala ketelik, buǵan deıin Atyraýdaǵy Zaroslyı jáne Gogolskıı kanaldaryn tereńdetý qashan aıaqtalatynyn jazǵan edik.