Atyraý oblysynda asa qaýipti mal aýrýynyń úsh oshaǵy anyqtalǵan

ATYRAÝ. KAZINFORM – Atyraý oblysynda asa qaýipti mal aýrýynyń úsh oshaǵy anyqtalǵan. Aýrý oshaqtary Inder men Qurmanǵazy aýdanynan tabylǵan.

Atyraý oblystyq aýyl sharýashylyǵy jáne jer qatynastary basqarmasynyń basshysy Amangeldi Salamattyń aıtýynsha, asa qaýipti aýrý oshaqtarynda shekteý jáne karantın sharalary belgilengen. Soǵan sáıkes tıisti jumystar atqarylǵan.

«Bıyl bekitilgen josparǵa sáıkes óńirdegi tórt túlikke asa qaýipti 11 túrli aýrýǵa qarsy 3 mln 551 myń 758 doza vaktsına egildi. Brýtsellez aýrýyna baılanysty 1 mln 50 myń 940 qan synamasy alyndy. Synama qorytyndysymen anyqtalǵan aýrý mal ıelerine jergilikti bıýdjet esebinen tıisti ótemaqy tólendi», - dedi Amangeldi Salamat. 

Onyń aıtýyna qaraǵanda, oblys aýmaǵynda sońǵy úsh jylda ýly qaraqurt kóbeıgen. Qaraqurttan tórt túlik, onyń ishinde túıe kóp zardap shekken.

«Maýsym-shilde aılarynda 485 túıeni qaraqurt shaqty. Sonyń saldarynan 90 túıe óldi. Al, 306 túıe sımptomatıkalyq emdeýden keıin saýyqty. Qazir 89 túıege emdeý sharalary júrgizilip jatyr. Ólgen mal ıelerine 65 mln teńgeden astam shyǵyn keltirildi. Atalǵan jaǵdaı jyl saıyn kóbeıip, mal ıeleri tarapynan alańdaýshylyq týyndap otyr», - dep málim etti Amangeldi Salamat.

Eske sala ketelik, buǵan deıin Atyraý oblysynda qaraqurt shaqqan 485 túıeniń toqsany ólgenin habarlaǵan bolatynbyz.