Atyraý oblysynda 30 jattyqtyrýshy jalǵan dıplommen jumys istep kelgen
ATYRAÝ. KAZINFORM — Atyraý oblysynda sybaılas jemqorlyqtyń qaýpi jıi anyqtalatyn salalardyń qatarynda medıtsına, sport, jol jáne ınfraqurylym bar. Máselen, sport salasynda 900 mln teńgeden astam qarjylyq buzýshylyq anyqtalyp otyr. Sondaı-aq 30 jattyqtyrýshy jalǵan dıplommen jumys istep kelgen.
Sybaılas jemqorlyqqa qarsy is-qımyl agenttigi Atyraý oblystyq departamentiniń basshysy Erulan Serikqalıevtyń aıtýynsha, dene shynyqtyrý, sport jáne týrızm basqarmasyndaǵy sybaılas jemqorlyq táýekeline taldaý jasalǵan.
«Taldaý nátıjesi boıynsha 900 mln teńgeden astam somanyń qarjylyq buzýshylyǵy anyqtalyp, 1 qylmystyq is qozǵaldy. Bıýdjetke 4 mln teńge kóleminde qarjy qaıtaryldy. Jalǵan dıplommen jumysqa ornalastyrylǵan 30 jattyqtyrýshy qyzmetinen bosatyldy. Jeke tulǵaǵa negizsiz berilgen „Muz aıdyny“ ǵımaraty kommýnaldyq menshikke qaıtaryldy. Senimgerlik basqarý shartyna sáıkes mindettemeler tıisinshe oryndalmaǵan basqa da sport ǵımarattaryn kommýnaldyq menshikke qaıtarý boıynsha jumys júrgizilip jatyr», — deıdi Erulan Serikqalıev.
Onyń deregine qaraǵanda salada júıeli sybaılas jemqorlyq táýekeli bar. Munyń saldary qandaı?
«Birinshiden, otandyq sporttyń damýyn tejeıdi. Ekinshiden, álemdik saıystarda joǵary kórsetkishterge qol jetkizýge kedergi keltiredi. Úshinshiden, halyqaralyq jarystarǵa qatysý úshin sportshylardy irikteýdiń ashyqtyǵyn kórsetetin protsesterge tsıfrlandyrý engizilmegen. Tórtinshiden, bul bıýdjet qarjysy men sybaılas jemqorlyq shemalaryn baqylaýsyz ıgerýge jaǵdaı jasaıdy», — deıdi Erulan Serikqalıev.
Osyndaı kemshilikterdi joıý úshin jergilikti ákimdikke birneshe usynys berilip otyr. Onyń biri — vedomstvolyq baǵynyshty mekemelerde «1S: Mekeme» baǵdarlamasyn engizýdi tolyq júzege asyrý.
«Munyń tıimdi tustary bar. Birinshiden, sport salasyndaǵy býhgalterlik esepti, qarjylyq basqarýdyń negizgi kezeńderin avtomattandyrýǵa múmkindik beredi. Ekinshiden, qarjyny tıimdi basqarýǵa jol ashady. Úshinshiden, qarjylyq buzýshylyq jasaýǵa uryndyratyn táýekeldiń aldyn alady», — dep málim etti Erulan Serikqalıev.
Departament basshysynyń birinshi orynbasary Nurlan Jahınniń pikirinshe, jol jáne ınfraqurylym, medıtsına salasyna júrgizilgen monıtorıng kezinde sybaılas jemqorlyqtyń 20-dan astam qaýipti táýekeli anyqtalǵan.
«Buǵan birneshe mysal keltirýge bolady. Máselen, bir merdigerge artyqshylyq beriledi. Sheneýnikter men merdigerler arasynda múddeler qaqtyǵysy bar. Josyqsyz qatysýshylar tiziminde turǵan kompanııalarmen shart jáne qosymsha kelisimder jasaý áli de toqtaǵan joq. Jol jóndeýge baılanysty birneshe derekti aıtýǵa bolady. Oǵan buryn kózdelmegen shyǵystardy qosý, tıimsiz josparlaý, memlekettik satyp alý konkýrsyn ótkizgenge deıin joldy salýǵa kirisý, bir baqylaýshyny birneshe nysanǵa bekitý, jumystardy aqaýmen qabyldaý, eń tómengi kepildik merzimin belgileý, ortasha jóndeýge vedomostvolyq saraptama júrgizbeý, tapsyrys berýshiniń kelisiminsiz qosymsha merdigerlerdi tartý, lıtsenzııasyz qurylys-montajdaý jumystaryn atqarý sekildi jaıttardy anyqtadyq. Tótenshe jaǵdaı kezindegi memlekettik satyp alýdy júrgizýde, onyń ishinde eshqandaı tájirıbesi joq merdigerlermen bir kózden tikeleı tásilmen shart jasaýda kemshilik baıqaldy», — deıdi Nurlan Jahın.
Al, medıtsına mekemeleriniń basshylary men bas esepshileri ózderiniń jalaqysyn jasandy jolmen kóterip otyrǵan.
«Densaýlyq saqtaý salasyndaǵy jemqorlyq qaterine taldaý júrgizý kezinde medıtsınalyq mekeme basshylary ózderiniń oqý aqysyn tóleý úshin eńbekaqy qorynyń qarjysyn paıdalaný faktileri anyqtaldy. Máselen, № 5 emhananyń dırektory Esil University-de oqý úshin 2,1 mln teńge, Geolog eldi mekenindegi emhananyń dırektory — 2,6 mln teńge, Atyraý oblystyq psıhıkalyq densaýlyq ortalyǵynyń dırektory — 3,2 mln teńge, Maqat aýdandyq aýrýhanasynyń dırektory — 2,6 mln teńge, № 3 emhananyń dırektory — 2 mln teńge jumsaǵan. Barlyq qarjy bıýdjetke qaıtaryldy», — dep habarlady departamenttiń baspasóz qyzmeti.
Eske sala ketelik, budan buryn Atyraýda 8 laýazymdy tulǵa tártiptik jaýapkershilikke tartylǵanyn habarlaǵan edik.
