Atyraý oblysynda 29,4 myń kópbalaly ana, 32 myńnan astam kásipker qyz-kelinshek bar
ATYRAÝ. KAZINFORM – Atyraý oblysynda mektep muǵalimderi men dárigerlerdiń basym bóligin qyz-kelinshekter quraıdy. Al óndiriste 6,9 myń áıel jumys isteıdi.
Atyraý oblysy ákimi Serik Shápkenovtiń aıtýynsha, qyz-kelinshekter tek memlekettik qyzmetpen shektelmeıdi.
– Atyraý oblysynda óndiriste jumys isteıtin 29,6 myń adam bar. Onyń 6,9 myńyn áıelder qurap otyr. Olardyń 5 myńǵa jýyǵy jumysshy mamandyǵyn ıgergen. Demek, qyz-kelinshekter tehnıkalyq jáne fızıkalyq jumystardy atqaryp júr, - deıdi Serik Shápkenov.
Máselen, Qyzylqoǵa aýdanynda turatyn eńbek ardageri Qamqa Aıtbaeva eńbek jolyn mehanızator bolyp bastaǵan.
– Túrli aýyr tehnıkany júrgizdim. Slesar bolyp ta jumys istedim. Qaı jumys ta ońaı emes. Biraq jumysyńdy erinbeı atqarar bolsań, adam eńbegińniń jemisin kóresiń. Qarapaıym eńbek jolynan ótip, zeınetke shyqtym, -deıdi Qamqa Aıtbaeva.
Oblys ákimdiginiń baspasóz qyzmeti usynǵan aqparatqa qaraǵanda, munaıly óńirde kópbalaly 29 479 ana bar. Onyń ishinde 3826 anaǵa «Altyn alqa», al 6363-ine «Kúmis alqa» berilgen. Sondaı-aq 200 ana «Ana dańqy», 322 ana «Ardaqty ana» nagradasyn alǵan.
Al oblystyq kásipkerlik jáne ónerkásip basqarmasy kásipkerlikti qoldaý bóliminiń basshysy Sáttiǵul Sabyrovtyń málimetinshe, 56 myńǵa jýyq dara kásipkerlik nysanynyń 58 paıyzyna qyz-kelinshekter jetekshilik etedi. Bul – 32 myńnan astam áıel.
– Áıelderdiń kásipkerligine qoldaý sharalary kóbeıdi. Máselen, byltyr «Bıznestiń jol kartasy – 2025» baǵdarlamasymen 400 kásipker áıelge qoldaý kórsetildi. Áleýmettik kásipkerlik baǵytymen 14 áıelge memlekettik qaıtarymsyz grant berildi. «Agrarlyq nesıe korporatsııasy» AQ Atyraý fılıaly arqyly jobasy qoldaý tapqan kásipkerlerdiń arasynda 71 qyz-kelinshek bar. «Bıznes-aımaq» óńirlik baǵdarlamasy aıasynda jergilikti bıýdjetten 500 mln teńge bólinip, kásipker áıelderdiń 17 jobasy qarjylandyryldy, - dedi Sáttiǵul Sabyrov.
Eske sala ketelik, budan buryn bosaný ústinde kóz jumǵan áıelderdiń arasynda kópbalaly analar kóp ekenin jazǵan edik.