Atyraý oblysy jylytý maýsymyna áli tolyq daıyn emes

Atyraý oblysynyń jylytý maýsymyna daıyndyǵy – 97 paıyz. Soǵan qaramastan, 15 qazanda ortalyqtandyrylǵan jylý qazandyqtarynan kópqabatty turǵyn úılerge jylý berý kózdelip otyr, dep habarlaıdy Kazinform agenttigi. 

Oblys ákimi Serik Shápkenovtiń tóraǵalyǵymen ótken ákimdik otyrysynda jylytý maýsymyna daıyndyq, órt qaýipsizdigi jóninde másele qaraldy.

«Óńirdegi «AtyraýJylýElektrOrtalyǵy» AQ qondyrǵylarynyń 56 paıyzy tozǵan. Bıyl atalǵan kásiporynda №5, 8 jáne 12-jylý agregaty jóndeýden ótkizildi. Qazir 8 agregat jumys istep tur. Osyndaı 6 agregat rezervke qoıylǵan. Endi №7 týrboagregatty jóndeý jumystary aıaqtalyp, iske qosý protsesi júrip jatyr. Al №10 týrboagregatty jóndeý jumysy 8 qazan-15 qarasha aralyǵynda aıaqtalady. 2 qazanda jańadan salynǵan rezervtik 65 MVt-ty quraıtyn №13 týrboagregat iske qosyldy. Kásiporynnyń 2024-2026 jyldarǵa arnalǵan josparyna sáıkes 3 jylytý qazandyǵyn jóndeý, jańadan №15 jylý qazandyǵy men 25 MVt-ty quraıtyn №11 týrboagregatty iske qosý josparlanǵan. Josparlanǵan osyndaı jumystar iske asyrylǵanda qondyrǵylardyń tozý deńgeıi 2 paıyzǵa tómendeıdi», - dedi Aıdýlat Kenjebekov.

Oblystyq tótenshe jaǵdaılar departamentiniń bastyǵy Nurlan Jańabaevtyń ótken jylytý maýsymynda 98 turǵyn úıde órt tirkelgen. Órttiń negizgi sebebi – elektr jabdyǵyn montajdaý jáne tehnıkalyq paıdalaný qaǵıdalaryn buzý.

«Tótenshe jaǵdaılarǵa den qoıý organdarynyń qyzmeti máseleleri jónindegi keńestiń hattamasyna sáıkes óńir ákimderine eldi mekender shekarasy sheginde gaz-tehnıkalyq ınspektsııalar qurý tapsyryldy. Alaıda, ınspektsııany qurý máselesi áli tolyq sheshilmegen kúıinde qalyp otyr. Mysaly, qala, aýdan ákimdikterinde qurylǵan gaz-tehnıkalyq ınspektsııasy ınspektorlarynyń fýnktsııasyn turǵyn úı-kommýnaldyq sharýashylyq qyzmetkerleri atqarady. Atalǵan qyzmetkerlerdiń beıimdik bilimi, sondaı-aq gaz salasynda biliktiligi joq», - dep málim etti Nurlan Jańabaev.

Serik Shápkenovtiń aıtýynsha, 15 qazanda kópqabatty turǵyn úılerge jylý berilýge tıis.

«Qazir aýa raıy sýytty. Endi alańsyz júre almaımyz. Jylytý maýsymyna bes kún qaldy. Alda úlken protsester bastalady. Sınoptıkter bıyl qys óte qatty bolady dep dabyl qaǵyp otyr. Sondyqtan daıyndyq jumystaryn kúsheıtip, kemshilikterdi ýaqytyly joıýdy suraımyn. Sebebi onyń suraýy qatty bolady», -dedi Serik Shápkenov.

Eske sala ketelik, buǵan deıin Atyraý oblysynyń qysqy jylytý maýsymyna daıyndyǵy 87 paıyz ekenin habarlaǵan bolatynbyz.