Atyraý oblysy kóktemgi sý tasqynyna qalaı daıyndalyp jatyr
ATYRAÝ. KAZINFORM – Atyraý qalasynyń mańyndaǵy, Qyzylqoǵa, Inder, Jylyoı jáne Mahambet aýdandarynda jaǵalaý bógetin nyǵaıtý qolǵa alynǵan. Kanaldar túbi tereńdetilip jatyr.
Atyraý oblystyq jumyldyrý daıarlyǵy jáne azamattyq qorǵaý basqarmasynyń bólim basshysy Bekturǵan Masatovtyń málimetinshe, kóktemgi sý tasqynynyń aldyn alý jumystaryna 1511 adam, 244 tehnıka, 187 motopompa, 20 júzý quraly, 3 tikushaq tartylady.
– Qazir kóktemde bolýy yqtımal sý tasqynyna daıyndyq pysyqtaldy. Osyǵan baılanysty 48,5 tonna janar-jaǵarmaı, 235 tonna ınertti materıal, 300 myńnan astam qapshyq, 69 dana shatyr jáne 5 myńnan astam tósek jabdyǵy daıyn tur. Atyraý qalasynyń mańyndaǵy Sokolok kanalynyń janynan 24 shaqyrym qosymsha arna qazylyp, túbi tereńdetildi. Al Gogolskıı kanalynyń 30 shaqyrymynda dál osyndaı jumys atqarylyp jatyr. Onyń eni – 18, tereńdigi – 2 metr. Osy kezge deıin 14 shaqyrymyndaǵy jumys aıaqtaldy, - dep habarlady Bekturǵan Masatov.
Onyń málimetine súıensek, Jylyoı aýdanyndaǵy Jem ózeni men Qursaı kanalynyń 95 shaqyrymyn tereńdetý kózdelgen. Onyń 46 shaqyrymy Qursaı kanalynda, 49 shaqyrymy Jem ózeninde júrgiziledi.
– Osy kezge deıin Qursaı kanalynyń 35 shaqyrymynyń enin 28 metrge keńeıtilip, túbi 4 metrge tereńdetildi. Jaǵalaýy bekitildi. Al Jem ózeniniń 25 shaqyrymynda osyndaı jumys atqaryldy. Atalǵan sý arnalarynyń 61 shaqyrymyna bóget soǵý josparlanǵan edi. Qazir onyń 10 shaqyrymynda jumys aıaqtaldy, -dedi Bekturǵan Masatov.
Eske sala ketelik, Atyraýda kanaldar arshylyp, bóget salynyp jatqanyn jazǵan edik.