Atyraý munaı óńdeý zaýytyndaǵy tekserý qarashaǵa deıin jalǵasady
Atyraý munaı óńdeý zaýytynyń negizgi qondyrǵylaryna tekserý júrip jatyr. Zaýyttyń qondyrǵylary qarashanyń alǵashqy onkúndiginde turaqty jumys rejımine shyǵady, dep habarlaıdy QazAqparat tilshisi.
Munaı óńdeý zaýytynda josparly tekserý jumysy 1 qazanda bastaldy. Osyǵan baılanysty negizgi qondyrǵylar jumysy toqtatyldy.
– Energetıka mınıstrligi bekitken kestege sáıkes Atyraý munaı óńdeý zaýytynda josparlanǵan tekserý jumystary bastaldy. Bul – qondyrǵylar jabdyqtarynyń turaqty jumys jaǵdaıyn saqtap, óndiristiń tıimdiligin arttyrýǵa arnalǵan jyl saıyn iske asyrylatyn is-shara. Tekserý jumystary kezinde tehnologııalyq jabdyqtar men qubyrlardy tehnıkalyq kýálandyrý, dıagnostıka jáne ónerkásiptik qaýipsizdik saraptamasynan ótkizý sekildi is-sharalar kesheni josparlandy. Apparattardy býmen tazalaý protsesi jabyq júıede júrgiziledi. Bul bý men kómirsýtek qospasynyń atmosferaǵa shyǵarýynyń aldyn alady. Suıyqtyqqa aınalǵan bý qospasy drenadjyq júıege jiberiledi. Atyraý qalasynyń ekologııalyq klımatyn jaqsartýǵa múddeli kásiporyn retinde «AMÓZ» JShS zııandy zattardyń atmosferaǵa taralýyn meılinshe azaıtýǵa qajetti barlyq sharany qabyldaıdy. Tekserý jumystary jabdyqtardyń qaýipsiz jáne senimdi jumysyn qamtamasyz etip, jospardan tys toqtatýlardy azaıtady, - dep habarlady zaýyttyń qoǵammen baılanys bólimi.
Qondyrǵylardy tekserý jumystaryn júrgizýge 1 600 jumysshy men 116 arnaıy tehnıka jumyldyrylǵan. Jumystyń kólemi 1 mln adam/saǵatqa josparlanǵan. Tehnologııalyq qondyrǵylar toqtatylǵan kezde reaktorlyq jabdyqtardaǵy katalızatorlar aýystyrylady.
– Barlyq jumys ónerkásiptik qaýipsizdik salasyndaǵy «Azamattyq qorǵaý týraly» Zańnyń talaptaryna sáıkes júrgiziledi. Energetıka mınıstrligimen kelisilgen josparǵa sáıkes munaı ónimderiniń negizgi túrlerin óndirý jáne jóneltý protsesi iske asyrylady. «QazMunaıGaz»-dyń ózge de munaı óńdeý zaýyttarynda janar-jaǵarmaıdyń jekelegen túrlerin óndirý kólemin arttyrý josparlanǵan. Atalǵan sharalar birinshi kezekte ekonomıkanyń áleýmettik mańyzy bar sektorlarynyń qajettiligin qamtamasyz etý, onyń ishinde kúzgi dala jumystary kezinde aýyl sharýashylyǵy taýarlaryn óndirýshilerge dızel otynyn jóneltip, ishki naryqtaǵy jaǵdaıdy turaqtandyrýǵa baǵyttalǵan, -dep málim etti qoǵammen baılanys bóliminen.
Josparlanǵan tekserý jumystary bastalǵanǵa deıin zaýyttyń rezervýarlarynda munaı ónimderiniń qory jınaqtalǵan. Rezervýarlarda 36 myń tonna avtobenzın, 32 myń tonna dızel otyny, 7,4 myń tonna áýe otyny bar. Qazan aıynda qosymsha 16 myń tonna avtobenzın, 28 myń tonna dızel otynyn óndirý josparlanǵan.
Zaýyt qondyrǵylarynyń turaqty jumys rejımine kóshýi qarasha aıynyń alǵashqy onkúndigine josparlanyp otyr.
Eske sala ketelik, buǵan deıin Atyraý munaı óńdeý zaýytynyń jumysy 1 qazanda toqtatylatynyn jazǵan edik.
