Atyraý kóshelerinen kesheden beri 2,4 myń tonna sý soryldy
ATYRAÝ. KAZINFORM — Atyraý qalasynda kún raıy qubylyp tur. Keıingi eki kúnde qar aralas jańbyr jaýyp, kósheler sýǵa toldy.
Shahar turǵyndary áleýmettik jelide aýlalar men kóshelerdi sý basqanyna shaǵymdanyp jatyr.
Atyraý qalalyq ákimdiginiń baspasóz qyzmetiniń málimetinshe, 109 biryńǵaı baılanys ortalyǵyna 5-6 aqpan kúnderi 78 meken-jaıdan 458 qońyraý túsken.
«Atyraý qalasynda 5 aqpannan beri artyq jaýyn-shashynnan bir aılyq mólsherden ylǵal tústi. Qazir ylǵaldyń mólsheri 13 mm-den artyq bolǵany ýaqytsha qolaısyzdyq týdyryp otyr. Osyǵan oraı, qala kóshelerinen erigen qar men jańbyr sýyn sorý jumysy toqtaýsyz júrgizilip jatyr. Sý sorýǵa 40-qa jýyq arnaıy tehnıka jumyldyryldy. Birinshi kezekte áleýmettik nysandardyń aýmaǵy kóp mólsherde sý jınalǵan kóshelerge nazar aýdaryldy. Búgin, 6 aqpanda jergilikti ýaqytpen saǵat 13:45-ke deıin qala kóshelerinen 2 450 tonna sý soryldy», -dep habarlady ákimdiktiń baspasóz qyzmeti.
Eske sala Atyraýda turǵyn úı alý kezeginde 21 myńnan astam adam turǵanyn jazǵan bolatynbyz.
