Atyraý qalasyndaǵy mektepter 29 sáýirde oflaın oqýǵa kóshedi

ATYRAÝ. KAZINFORM – Atyraý qalasynyń mektepteri 29 sáýirde oflaın oqýǵa kóshedi.

Atyraý oblysy ákiminiń orynbasary Jasulan Bısembıevtiń aıtýynsha, aldaǵy dúısenbide mektepterdegi sabaq shtattyq rejımde ótedi. 

«Atyraý qalasynda jáne onyń mańyndaǵy eldi mekenderinde Jaıyq ózeniniń jaǵalaýyn nyǵaıtý jumystary aıaqtaldy. Osyǵan baılanysty 29 sáýirde oblys ortalyǵyndaǵy barlyq mektebi oflaın oqytý formatyna kóshedi», - dep habarlady Jasulan Bısembıev. 

Onyń aıtýyna qaraǵanda, oqýshylardyń keıbiri belgili sebeppen Atyraý qalasynan tysqary jerde bolýy múmkin. Sol sebepten, olar oqýdy onlaın formatta jalǵastyra alady. 

Munaıly shahardaǵy bilim ordalarynda 6037 pedagog jumys isteıdi. 

Eske sala ketelik, budan buryn Atyraý qalasyndaǵy mektepterde sabaq onlaın ótetinin habarlaǵan edik. 

Keıin Atyraý oblysynda 149 myń oqýshy jıyntyq baǵalaýdan bosatylǵanyn jazǵan bolatynbyz.