Atyraý-Oral trassasyndaǵy 67-68-shaqyrymnyń ústimen tasqyn sý ótip jatyr

ATYRAÝ. KAZINFORM – Atyraý-Oral trassasyndaǵy 67-68-shaqyrymnyń ústimen tasqyn sý ótip jatyr.

Mahambet aýdany ákimdiginiń málimetine súıensek, búgin «Mahambet» sháıhanasynyń tusyna tasqyn sý mol jınalǵan. 

«Soǵan baılanysty sháıhanaǵa taıaý mańnan ótetin respýblıkalyq mańyzy bar Atyraý-Oral trassasynyń boıyna salynǵan bóget ashyldy. Bógetti ashýǵa 6 arnaıy tehnıka tartyldy. Qazir atalǵan trassanyń 67-68-shaqyrymynyń ústimen tasqyn sý ótip jatyr. Joldyń bul bóligi Jaıyq ózeniniń jaǵalaýynan shamamen 6-7 shaqyrym qashyqtyqta ornalasqan», -dep habarlady aýdandyq ákimdikten.

Búgin keshki saǵat 20:00-de Jaıyq ózenindegi sý deńgeıi Mahambet aýdanynda 10 metr 23 santımetrdi qurady Bul qaýipti shekten 173 santımetrge kóp. Degenmen, aýdandaǵy eldi mekenderge tónip turǵan qaýip joq. 

Eske sala ketelik, buǵan deıin Atyraý-Oral trassasynan Taldykól aýylyna baratyn joldy tasqyn sý basqanyn jazǵan bolatynbyz. 

Sondaı-aq, Atyraý-Inder trassasynyń Atyraý qalasyna kiretin bóligi jabylǵanyn jazǵan edik.