«Atyraý-Astrahan» avtojolynyń qurylysy bıyl aıaqtalady
ASTANA. KAZINFORM – Respýblıkalyq mańyzy bar «Atyraý-Astrahan» avtomobıl jolynyń 616-833 shaqyrymynyń Reseı Federatsııasyna deıingi ýchaskesinde qaıta jańartý jumystary atqarylyp jatyr.
«Bul ýchaskedegi jumystar 2018 jyly bastaldy. Búginde 60 shaqyrym jol aıaqtalyp, qoldanysqa berildi. Qazir qalǵan 217 shaqyrym jolda qaıta jańarý (616 shaqyrymnan 833 shaqyrymǵa deıin) jumystary júrip jatyr. Jobanyń halyqaralyq standarttarǵa sáıkes oryndalýyna baılanysty, jergilikti kompanııalarmen qatar, Italııa, Túrkııa jáne Ázerbaıjan eliniń kompanııalary da qatysyp jatyr», - dep habarlaıdy «QazAvtoJol» ulttyq kompanııasy.
Óńirdegi sý tasqynyna qaramastan, merdiger kompanııalar aýa raıynyń qolaılylyǵyna baılanysty qurylys jumystaryna kirisip ketken.
«Qazir jobaǵa 400-ge jýyq arnaıy jóndeý-qurylys tehnıkasy men 650 asa jumysshy jumyldyryldy. Byltyr 616-833 shaqyrym aralyǵyndaǵy ýchaskede uzyndyǵy 210 shaqyrym bolatyn kólemi 3,7 mln tekshe metr jol tóseminiń qurylysy aıaqtaldy. Sondaı-aq 187,5 shaqyrym aralyqta negizgi qabat jáne 187 shaqyrymda iri asfalt betonynyń tómengi qabaty tóseldi. Osylaısha, 187 shaqyrym aralyqta qaýipsiz ári qolaıly qozǵalys úshin jańa asfalt betony tóseldi», - deıdi vedomstvodan. Jyl basynan beri 22 myń tonnadan astam asfalt betony tóselgen (9 shaqyrym jol). Bul aımaqta ınertti materıaldardyń tapshylyǵyna baılanysty jobadaǵy qaıta jańarý jumystary uzaqqa sozylyp jatyr. Jol salýǵa qajetti qıyrshyq tastar 1000 shaqyrymnan astam jerde ornalasqan Muǵaljar jáne Birshoǵyr stansalarynan temirjol arqyly jetkiziledi. Buryn bul ýchaske arqyly jol júrý uzaqtyǵy 5 saǵat bolsa, 2 saǵattyń ishinde júrip ótýge bolady. 2024 jyldyń sońyna deıin joba jumystaryn aıaqtaý josparlanyp otyr», - delingen aqparatta.
Eske sala keteıik, Atyraý oblysynyń ákimi Serik Shápkenov «Atyraý-Astrahan» avtojolynyń qurylysyn 2024 jyly tolyq aıaqtaımyz degen edi.
