Atyraý ákimdigi meıramhana úshin berilgen jer telimin qaıtarýdy talap etti

ATYRAÝ. KAZINFORM — Atyraý qalasynyń ákimdigi meıramhana úshin berilgen jer telimin qaıtarý úshin sotqa júgindi. Sot sheshimimen ákimdiktiń talabyn qanaǵattandyrǵan. Alaıda jeri telimin alǵan «ATTs-Galereıa» JShS-niń basshylar ákimdiktiń talabymen de, sottyń sheshimimen de kelispeı otyr.

Seriktes zańgeri Natalıa Sonnyń aıtýynsha, ákimdik ókilderi 2021 jyly Atyraý qalasynda McDonald’s meıramhanasyn ashý týraly usynys bildirgen. Soǵan baılanysty taraptar memorandýmǵa qol qoıǵan. Memorandýmǵa sáıkes ákimdik jer telimin berý, seriktestik meıramhana salyp, múgedekter úshin eki taksı kóligin satyp alý berýge kelisken. 

— Búgingi kúni Atyraý qalasynyń ákimdigi prokýratýra men jerge ornalastyrý bóliminiń hattaryn negizge alyp, meıramhana ornalasqan jer telimine qatysty satyp alý-satý shartyn jaramsyz dep taný týraly talap aryzben sotqa júgindi. Birinshi satydaǵy sottyń sheshimimen ákimdiktiń talap aryzy qanaǵattandyryldy. Demek, mámile jaramsyz dep tanylsa, jer teliminen de, meıramhanadan da bas tartýymyz kerek. Mundaı jaǵdaıda qyzmetimizdi toqtatyp, 70-ten astam qyzmetkerdi jumystan shyǵarý qajet. Biz jobaǵa salynǵan 1 mlrd teńgeden astam jeke ınvestıtsııany joǵaltamyz, — deıdi Natalıa Son.

Zańgerdiń aıtýyna qaraǵanda, bul daýly máseleni sotqa shaǵymdanbaı, medıatsııa tártibimen sheshý múmkindigi qarastyrylǵan. Sol sebepten, Atyraý oblystyq kásipkerler palatasyna habarlasqan.  «Atyraý» áleýmettik-kásipkerlik korporatsııasy» AQ-nyń departament dırektory Qýanysh Úmbetovtiń deregine súıensek, atalǵan seriktestikke jer telimi koropratsııa arqyly berilgen. 

— Jer ýchaskesi ınvestıtsııalyq jobaǵa komıssııanyń sheshimimen, sol kezdegi qoldanystaǵy erejeler saqtalyp, aýktsıonsyz berilgen. Biz sot sheshimimen kelispeımiz. Birjaqty boldy dep esepteımiz. Óıtkeni jer telimi meıramhanaǵa berilgende óz óndirisi, atap aıtqanda, nan ónimderi bar dep kórsetilgen. Biz máseleni medıatsııa tártibimen sheshkimiz keledi. Olaı bolmaǵan jaǵdaıda appelıatsııalyq shaǵym túsiremiz, — deıdi Qýanysh Úmbetov.

Atyraý oblystyq kásipkerler palatasynyń ókilderiniń pikirinshe, 2022 jyly Atyraý oblysynyń jer resýrstaryn basqarý basqarmasy ákimdik tarapynan jer telimderin aýyl sharýashylyǵy óndiristik kooperatıvterine berý jumystary barysynda qoldanystaǵy zańnamanyń saqtalýyna tekserý júrgizgen. Tekserýdiń qorytyndysymen basqarma tarapynan Atyraý qalalyq ákimdigine jer zańnamasyn buzýshylyqtardy joıý týraly usynys berilgen. Onda aýyl sharýashylyǵy óndiristik kooperatıviniń ýaqytsha óteýli jer paıdalaný quqyǵyn 5 jyl merzimge berý týraly ákimdiktiń sheshimi Jer kodeksiniń 18, 37, 44-1-baptarynyń negizinde qabyldanǵany, biraq jer ýchaskeleri 48-baptyń talaptary negizinde berilýge tıis ekendigi kórsetilgen. 

Osyǵan baılanysty keıin Atyraý qalalyq prokýratýrasy seriktestikke zańsyz berilgen jer telimin memleket menshigine qaıtarý máselesin sotqa deıingi tártipte qaraýdy talap etip, ákimdikke hat joldaǵan. Al ákimdik «Atyraý» ÁKK» AQ men «ATTs-Galereıa» JShS arasyndaǵy jer telimin satyp alý-satý shartyn jaramsyz dep taný talabymen ekonomıkalyq sotqa júgingen.

Qazaqstan Kásipkerler quqyǵyn qorǵaý jónindegi ýákildiń Atyraý oblysy boıynsha departamentiniń sektor meńgerýshisi, oblystyq kásipkerler palatasy dırektorynyń orynbasary Sársenbaı Joldybaevtyń pikirinshe, kásipkerlik sýbektisi tarapynan kelisimniń barlyq talabyn oryndap, jobany júzege asyrǵan. Jańa jumys ornyn ashyp, salyq tólep otyr. 

— Joba iske asqannan eki jyl ótken soń, ákimdiktiń jerdi zańsyz bergeni belgili boldy. Kásipkerdiń jobaǵa 1 mlrd teńge saldy. Endi qyzmetin toqtatqanda 6 mlrd teńge shyǵynǵa batady. Qyzmetkerler jumyssyz qalady. Aldyn ala quqyqtyq saraptama júrgizip, atqarýshy organdardyń qorytyndysyn aldyq. 2024 jyly jer telimderin berý kezinde jobanyń ınvestıtsııalyq qunyn anyqtaý qaǵıdalaryna ózgerister engizilgen. Bul joba sonyń qataryna jatady. Endi jer telimin qaıtaryp alǵysy kelse, mynadaı másele týyndaıdy. Bolashaqta qaıtarylǵan jer telimin qalaı paıdalanady? Eger kásipkerlik maqsat kózdelse, burynnan bar ǵımaratty buzýdyń ne qajeti bar? Sebebi bul jer basqa maqsatqa jaramaıdy. Sondyqtan bizdiń bir ǵana usynysymyz bar. Bul nysandy zańdastyryp, kásipkerdi jaıyna qaldyrý qajet, — deıdi Sársenbaı Joldybaev.

Onyń paıymdaýynsha, kásipkerler palatasy ákimdikke bul jaıtty medıatsııa tártibimen retteý týraly usynys bergeli otyr. Jergilikti atqarýshy organ buǵan kelispese, bznestiń múddesi sotta qorǵalady. 

Eske sala ketelik, budan buryn Atyraýda turǵyndarǵa jer telimin berý ýaqytsha toqtatylǵanyn jazǵan bolatynbyz.