Aty ańyzǵa aınalǵan fýtbolshylar Astanada aǵash otyrǵyzdy
ASTANA. KAZINFORM – Astanada respýblıkalyq «Taza Qazaqstan» ekologııalyq aktsııasy aıasynda aty ańyzǵa aınalǵan fýtbolshy Kolo Týre men Fadıga Halılý kóshet otyrǵyzdy, dep habarlady elorda ákimdiginiń resmı saıty.
Elimizge fýtboldan jas órenderdi irikteý maqsatynda «Super bol» jobasyna arnaıy kelgen Kolo Týre men Fadıga Halılý Astana qalasyndaǵy Qazaqstan fýtbol federatsııasy aýmaǵynda kóshet otyrǵyzý aktsııasyna qatysty.
«Qazaqstanǵa fýtbol jobasyna arnaıy qonaq retinde birinshi ret keldim. Tek jasyl alańda ǵana emes, qalanyń ekologııasyn saqtaý maqsatynda uıymdastyrylǵan aktsııaǵa qatysqanyma óte qýanyshtymyn. Buǵan deıin de kóptegen qalalarda boldym. Al Astananyń ózindik ádemiligi bar. Tazalyǵy bir jolǵa qoıylǵany kórinip tur. Bastysy meni syılap, shaqyrǵandaryńyzǵa qýanyshtymyn!» - dedi kezinde «Arsenal», «Manchester Sıtı», «Lıverpýl» sapynda dop tepken fýtbolshy Kolo Týre.
Aıta keteıik, 8 sáýirde bastalǵan «Taza Qazaqstan: Astana – tazalyq pen tártiptiń úlgisi» aktsııasy aıasynda 29 sáýir ben 4 mamyr aralyǵynda qarttar úıi, ardagerler, qyzmet barysynda qaza tapqan quqyq qorǵaý organdary qyzmetkerleriniń otbasy turatyn úıler aýmaǵyn abattandyrýǵa baǵyttalǵan «Ónegeli urpaq» taqyryptyq aptalyǵymen jalǵasyp jatyr.
Bıyl Astanada barlyǵy 1,1 mıllıon jasyl jelek otyrǵyzý josparlanyp otyr. Úsh aptada qalada 74 myńnan astam kóshet otyrǵyzyldy.
Esterińizge sala keteıik, 3 aptadan beri elordada «Taza Qazaqstan: Astana – tazalyq pen tártiptiń úlgisi» ekoaktsııasy ótip jatyr. Keń kólemdi ekologııalyq naýqan aıasynda qalany, nóser jáne sýarý júıelerin sanıtarlyq tazalaý, kóshelerdi, trotýarlardy, kvartalishilik aýmaqtardy, qoǵamdyq oryndar men aýlalardy tazalaý júrgizilýde. Sondaı-aq jasyl jelekterdi kútip-baptaý jáne otyrǵyzý, saýda nysandaryna jaqyn aýmaqtardy tazalaý, kógaldar men gúlzarlardy tazalaý, ruqsat etilmegen qoqystardy joıý jáne t.b. júrgiziledi.
