Ataýly áleýmettik kómekti jalaqy retinde qabyldaýǵa bolmaıdy – Narıman Muqyshev

NUR-SULTAN. QazAqparat - QR Eńbek jáne halyqty áleýmettik qorǵaý vıtse-mınıstri Narıman Muqyshev Qostanaı oblysyna jumys sapary aıasynda Halyqty jumyspen qamtý ortalyqtaryna (HJQO) baryp, onda ataýly áleýmettik kómek (AÁK) kórsetýdiń jańa erejelerin túsindirdi, dep habarlaıdy atalǵan vedomstvonyń baspasóz qyzmeti.

Narıman Muqyshev óńirdegi baǵdarlamasyn Qostanaı aýdanynyń Halyqty jumyspen qamtý ortalyǵyna barýdan bastady, onyń qyzmetkerleri vıtse-mınıstrdi AÁK taǵaıyndaýǵa ótinishterdi qabyldaý barysymen tanystyrdy. Muqyshev Halyqty jumyspen qamtý ortalyǵynyń qyzmetkerlerimen sóılesip, ataýly áleýmettik kómek kórsetýdiń jańa qaǵıdalaryn sapaly túsindirý qajettiligine nazar aýdardy.

«Sizder konsýltatsııa berý kezinde azamattarǵa aqparatty durys jetkizýlerińiz kerek. AÁK-ti jalaqy retinde qabyldaýǵa bolmaıtyny týraly habarlaý qajet. Bul ómirlik qıyn jaǵdaıǵa tap bolǵan otbasylarǵa memlekettiń qoldaýy», – dedi Narıman Muqyshev.

Jańa qaǵıdalarǵa sáıkes, eger otbasynyń eńbekke qabiletti múshesi jumyspen qamtýǵa járdemdesýdiń usynylǵan belsendi sharalarynan bas tartsa, onda ol jáne onyń otbasynyń barlyq músheleri AÁK alý quqyǵynan aıyrylady.

«Bul negizgi másele. Taǵaıyndalǵan AÁK-ke qaramastan, otbasynyń eńbekke jaramdy músheleri jumys isteýi tıis. Bul memlekettiń qoldaýymen ómirlik qıyn jaǵdaıdan shyǵýǵa kómektesedi. Siz olarǵa bos jumys oryndaryn usynasyz, al azamattar óz kezeginde jumysqa ornalasady», – dedi ol.

Ol sondaı-aq AÁK alatyn otbasylardyń balalaryna aǵymdaǵy jyldyń aqpan aıynan bastap kepildik berilgen áleýmettik toptama usynatynyn atap ótti. 1 jastan 6 jasqa deıingi balalar úshin áleýmettik toptamaǵa azyq-túlik jıyntyqtary men gıgıenalyq kerek-jaraqtar engizilgen. 6 jastan 18 jasqa deıingi balalar úshin mektepterde ystyq tamaq, oqý quraldary men mektep kıimderin berý kózdeledi. Sondaı-aq, osy sanattaǵy balalar úshin mektepke deıingi jol júrý shyǵyndaryn óteıtin bolady. Medıtsınalyq, onyń ishinde stomatologııalyq kómek 18 jasqa deıingi balalarǵa tegin medıtsınalyq kómektiń kepildik berilgen kólemi jáne mindetti áleýmettik medıtsınalyq saqtandyrý sheńberinde kórsetiletin bolady.

Budan basqa, 2020 jylǵy 1 qańtardan bastap kámeletke tolmaǵan 4 jáne odan da kóp nemese 23 jasqa deıingi kúndizgi oqý bóliminde oqıtyn stýdent balalary bar otbasylarǵa memlekettik járdemaqy engizildi.

«Bul memlekettik járdemaqy otbasynyń tabysyna qaramastan 42 496 teńgeden 74 388 teńgege deıin saralanǵan mólsherde tólenedi. Qańtar aıynda járdemaqy tóleýge jalpy somasy 17,7 mlrd teńgeni qurady. Respýblıka boıynsha 368 myń kópbalaly otbasy, onyń ishinde Qostanaı oblysynan 5 myńnan astam otbasy memlekettik járdemaqy aldy», – dep túıindedi vıtse-mınıstr.

Narıman Muqyshev jumys sapary aıasynda Altynsarın aýdany men Qostanaı qalasynyń Halyqty jumyspen qamtý ortalyǵynda túsindirý jumystaryn júrgizedi. Budan basqa, ol Qostanaı oblysynyń qalalary men aýdandarynyń ákimdikterimen jańa formattaǵy AÁK taǵaıyndaý máseleleri boıynsha selektorlyq keńes jáne Áleýmettik qyzmetter portalynda 2020 jylǵy 1 qańtardan bastap tirkelgen múgedekterdi tehnıkalyq ońaltý quraldaryn jáne qyzmetterin usynatyn ónim berýshilermen kezdesý ótkizýdi josparlap otyr.

Budan buryn habarlanǵandaı, aǵymdaǵy jylǵy 13-14 qańtarda vıtse-mınıstr Aqtóbe oblysynda kópbalaly otbasylardy qoldaý jáne AÁK kórsetý máseleleri boıynsha túsindirý jumystaryn júrgizdi.

Esterińizge sala keteıik, 2020 jylǵy 1 qańtardan bastap ashyqtyqty, maqsattylyqty, ádilettilikti jáne jumysqa yntalandyrýdy qamtamasyz etý úshin Qazaqstanda AÁK taǵaıyndaýdyń jańa tetigi engizildi. Memlekettik kómek sharalary keshendi túrde júzege asyrylady: kópbalaly otbasylarǵa beriletin memlekettik járdemaqy, jetildirilgen ataýly áleýmettik kómek, áleýmettik jaǵdaıy tómen otbasylardaǵy balalarǵa kepildik berilgen áleýmettik toptama.