Atamqulov «KazSat-2» jer serigindegi aqaýdyń sebepterin atady

ASTANA. QazAqparat - Búgin Májilistegi Úkimet saǵatynda QR Qorǵanys jáne aeroǵarysh ónerkásibi mınıstri Beıbit Atamqulov «KazSat-2» jer serigi jumysyndaǵy aqaýǵa baılanysty sebepterdi atady, dep habarlaıdy QazAqparat. 

«Buǵan aýyr bólshekter yqpal etti. Atap aıtqanda, spýtnıktiń negizgi ýaqyty ǵarysh keńistiginde ótedi, osy oraıda túrli bólshekter men joǵary jáne tómen temperatýralardyń áseri bolady. Mamandardyń tájirıbesi men jumysynyń arqasynda spýtnıkti ornyna qoıdyq. Osy kezeńde álemde tórt jer serigi shyǵyp qaldy, jumysynda aqaý baıqaldy. Kúndegi jarqyl, sondaı-aq atalǵan bólshekter apparattyń jumysyna yqpal etti»,-dedi mınıstr.

Sonymen qatar Atamqulov kıbershabýyldar jónindegi qaýesetti joqqa shyǵardy. Onyń sózinshe,  «KazSat-2» jáne «KazSat-3» spýtnıkteri avtonomdy túrde jumys istep jatyr.

«Árbir operatordyń óziniń arnaıy ІR-núktesi, logıni men qupııasózi bar. Basqarý júıesi ınternetpen ózara baılanysty emes, ıaǵnı júıege kirý úshin árbir operator boıynsha ár is-qımylǵa arnaıy logın qajet. Osyndaı qorǵanys júıesi spýtnıkti qurastyrý kezinde eskerildi. Sondyqtan ınternetke qosylmaǵandyqtan, kıbershabýyldar ony basqarýǵa áser ete almaıdy»,-dedi mınıstr.

Esterińizge sala keteıik , 2017 jyldyń 31 naýryzynda Astana ýaqytymen saǵat 08:22-de «KazSat-2» spýtnıginiń qazaqstandyq jerústi operatorlarynyń sıgnaly nasharlady.