Ata-analardan aqsha jınaǵan Aqmola oblysynyń bilim qyzmetkerleri jazalandy
QR Sybaılas jemqorlyqqa qarsy is-qımy agenttiginiń Aqmola oblysy boıynsha departamentinen málim etkendeı, bıyl 1424 Call-ortalyǵyna óńir turǵyndarynan 20-dan astam qońyraý túsken. Olardyń arasynda bilim berý mekemelerinde zańsyz aqsha jınaýǵa qatysty máseleler de bar.
Máselen, Atbasar qalasynyń ártúrli mektebinde bilim alatyn oqýshylardyń ata-analarynan oqý oryndarynyń qajettiligine aqsha jınalǵanyna qatysty aryz túsken. Osyǵan sáıkes, Sybaılas jemqorlyqqa qarsy is-qımyl departamenti janyndaǵy arnaıy monıtorıngilik top pen oblystyq Bilim basqarmasy kóshpeli qyzmettik tekserý júrgizgen.
330-ǵa jýyq ata-anadan anonımdi saýalnama alynǵan.
«Tekserý nátıjeleri boıynsha qala mektepteriniń túrli qajettilikteri úshin zańsyz aqsha jınaý faktileri anyqtaldy», - dedi departamentten.
Sondaı-aq osyǵan uqsas faktiler Stepnogorsk qalasynyń bilim berý salasynyń qyzmetkerlerine qatysty qyzmettik tekserý barysynda da anyqtalǵan.
Nátıjesinde, Atbasar aýdanynyń jáne Stepnogorsk qalasynyń bilim bólimderiniń basshylary, mektep dırektorlary tártiptik jaýapkershilikke tartyldy.
«Osyndaı quqyq buzýshylyqtarǵa jol bermeý maqsatynda oblystyń bilim berý mekemeleriniń basshylyǵymen túsindirý kezdesýi ótkizildi», - dep qosty vedomstvodan.