«AstraZeneca» Qazaqstanda qandaı dáriler óndiretini belgili boldy
ASTANA. KAZINFORM – Densaýlyq saqtaý mınıstrligi Kazinform saýalyna joldaǵan jaýabynda «AstraZeneca» farmatsevtıkalyq kompanııasymen birlesken jobalardyń egjeı-tegjeıin aıtty.
«2023 jyldyń 7 aqpanynda «AstraZeneca» halyqaralyq bıofarmatsevtıkalyq kompanııasymen Qazaqstan aýmaǵynda dári óndirisin uıymdastyrý úshin tehnologııany tabystaý týraly kelisimshart jasalǵan. Bul Qazaqstannyń farmatsevtıkalyq ındýstrııasyn damytýǵa múmkindik beredi. Bul óz kezeginde halyqqa ınnovatsııalyq dári-dármektiń qoljetimdiligin arttyrady», - delingen jaýapta.
Mınıstrliktiń málimeti boıynsha, «AstraZeneca» kompanııasy Qazaqstan aýmaǵynda mynandaı dári-dármektiń óndirisin uıymdastyrmaq:
• Forxiga Tablets 10mg – qant dıabeti, sozylmaly júrek aýrýy, búırektiń sozylmaly aýrýy;
• Calquence Caps 100mg – sozylmaly lımfoleıkoz, mantııa jasýshasynyń lımfomasy;
• Lynparza 150mg – analyq bezdiń qaterli isigi, sút beziniń qaterligi isigi, prostata obyry, uıqy beziniń qaterli isigi;
• Tagrisso Tablets 80mg – ókpeniń qaterli isigi.
Eske salsaq, Ulybrıtanııa men Qazaqstannyń 8-shi úkimetaralyq komıssııasynyń plenarlyq otyrysy aıasynda QR Densaýlyq saqtaý mınıstrligi men «AstraZeneca» kompanııasynyń Qazaqstandaǵy ókildigi arasynda ózara túsinistik týraly memorandýmǵa qol qoıylǵan bolatyn.
