Astananyń eń qymbat mektepterinde oqý qansha turady

ASTANA. QazAqparat – Ár ata-ana balasynyń sapaly bilim alǵanyn qalaıdy, onyń bir joly - jeke mektepke berý, al onda bilim aqyly. Osy oraıda, QazAqparat tilshisi elordadaǵy qymbat mektepter men olaryń baǵasyna taldaý jasap kórgen edi.

Búginde elordada 169 jalpy bilim beretin mektep bar, onyń 101-i - memlekettik, 7-eýi - respýblıkalyq jáne 61-i - jekemenshik mektep.

Aıta ketetin jaıt, jekemenshik mektepterde synyp joǵarylaǵan saıyn oqý aqysy da óse túsedi. Oqý qunynyń ishine mektep formasy, oqýlyqtar men qosymsha bilim berý bólimderi, keıde tamaqtaný aqysy kiredi.

Elordadaǵy eń qymbat mektepterdiń biri - QSI halyqaralyq mektebi, onda oqý aqysy - jylyna 12 mıllıon teńge. Sonymen qatar, oqýǵa túsý kezinde ár oqýshydan 140 myń teńge mólsherinde jarna jınalady.

Kópke tanymal Haileybury halyqaralyq mektebi bastaýysh synyptardy 9 mıllıon 50 myń teńgege oqytady. Brıtandyq oqý baǵdarlamasyn usynady. Budan basqa, 45 myń teńge tirkeý jarnasyn jáne 450 myń teńge mólsherinde kepildik jarnany tóleý qajet.

Taǵy bir Spectrum halyqaralyq mektebinde 1-5 synyp oqýshylarynyń jyldyq oqýy 6 mıllıon 550 myń teńge turady.

«Mıras» halyqaralyq mektebindegi bilim berý qyzmetiniń baǵasy - jylyna 4 mıllıon 250 myń teńge, al túsý jarnasy - 400 myń teńge.

Astana Garden school bastaýysh synyptarynda, halyqaralyq baǵdarlamasy bar jekemenshik mektepte oqý quny - 4 mıllıon 100 myń teńge. Alǵashqy jarna - 500 myń teńge.

Birinshi synyp oqýshysynyń NURORDA mektep-lıtseıinde oqý quny - 3 mıllıon 800 myń teńge. Odan bólek, kúnine úsh ret tamaqtanǵany úshin 595 myń teńge tóleýge týra keledi.

Astanadaǵy Tamos Space School ǵarysh mektebinde balańyzdy 3 mıllıon 78 myń teńge tólep oqyta alasyz. Aıta keterligi, oqý aqysy ishine mektep formasy, tasymaldaý jáne qosymsha úıirmeler kirmeıdi. Alǵashqy jarna - 300 myń teńge.

MILESTONE jan-jaqty damý mektebi birinshi synyp oqýshylaryna 2 mıllıon 90 myń teńgege bilim beredi. Sondaı-aq, oqý jylyna birjolǵy tólem kezinde 100 myń teńgege jeńildik beriledi.

Flagman fızıka-tehnıkalyq lıtseıi óz kezeginde jylyna 1 mıllıon 950 myń teńgege bilim berý qyzmetin usynady.

Al, «Tsentralnaıa» jeke ekonomıkalyq mektebinde oqý aqysy - jylyna 1 mıllıon 800 myń teńge. Bastapqy kirý jarnasy - 300 myń teńge. Balalardy tasymaldaýǵa aıyna 54 myń teńge tóleý kerek.