Astananyń 3 jyldyq bıýdjeti talqylandy

ASTANA. QazAqparat – Búgin Astana qalalyq qoǵamdyq keńesinde elordanyń 2023-2025 jyldarǵa arnalǵan bıýdjetine qatysty tyńdaý ótti, dep habarlaıdy QazAqparat tilshisi.

Jıynda negizgi baıandama jasaǵan Astana qalalyq strategııalyq jáne bıýdjettik josparlaý basqarmasy bastyǵynyń orynbasary Aıjan Túgelbaevanyń dereginshe, páterlerdi satýdan túsetin túsimderdi esepke almaǵanda 2023-2025 jyldardaǵy qalanyń ózindik kirisi 1 trln 653,5 mlrd teńge bolmaq. Al keler jyly qala bıýdjeti 553,1 mlrd teńgege tolyǵady.

«Respýblıkalyq bıýdjetten damýǵa arnalǵan maqsatty transfertter somasy 139 mlrd teńgeni, onyń ishinde 2023 jyly 102,3 mlrd teńgeni quraıdy. Astana respýblıkalyq bıýdjetke 70 mlrd teńge mólsherinde alym tóleýi tıis», - dedi ol.

Aıjan Túgelbaevanyń dereginshe, aldaǵy úsh jylǵa Astana ákiminiń apparatyna 6 mlrd 493,8 mln teńge, al kelesi jylǵa 2 mlrd 527,3 mln teńge kózdelgen. Al qalanyń 4 aýdanyna ózderine júktelgen qyzmetterdi atqarýǵa, sonymen qatar azamattardy shaqyrý jáne tirkeý, aýmaqtyq qorǵanys, jerleý oryndaryn sanıtarııalyq qamtamasyz etý, abattandyrý, jaryqtandyrý, kútip ustaý úshin 2023 jylǵa 44 mlrd 262,6 mln teńge qarastyrylǵan.

«Onyń ishinde Almaty aýdany apparatyna – 10 mlrd 914,9 mln teńge, Baıqońyr aýdanyna - 8 mlrd 288,5 mln teńge, Esil aýdanyna – 15 mlrd 272,1 mln teńge, Saryarqa aýdanyna – 9 mlrd 887,1 mln teńge», – dedi basqarma bastyǵynyń orynbasary.