Astananyń irgesinde jańa sút zaýyty ashyldy
Aqmola oblysynyń Tselınograd aýdanynda qazirgi zamańǵy tehnologııamen jabdyqtalǵan «Moıa ferma» zamanaýı sút zaýyty iske qosyldy, dep habarlaıdy Kazinform tilshisi.
Investıtsııalyq jobany «Nurly» óndiristik kooperatıvi júzege asyrǵan. Zaýyttyń ashylýyna Tselınograd aýdanynyń ákimi Bahydbek Ospanbekov, kásiporyn dırektory Qýanysh Naıman qatysty.
— Zaýyt bes aıda salyndy. Jobanyń quny — 130 mln teńge. Jabdyq satyp alyndy. Qazirgi ýaqytta iske qosý-jóndeý jumystary júrip jatyr. Zaýytta táýligine 3000 tonnaǵa deıin sút óńdeýge bolady. Ázirshe táýligine 1200 lıtr sút óńdeýden ótip jatyr. On adamdy turaqty jumyspen qatymyp otyrmyz, — dedi Qýanysh Naıman.
Osy rette aýdan basshysy óńirde kásipkerlikti damytýǵa qolaıly jaǵdaı jasalyp jatqanyn atap ótti.
— Biz árqashan tamaq jáne qaıta óńdeý ónerkásibin damytýǵa múddelimiz jáne búkil aýyl sharýashylyǵy óndirýshilerine qoldaý kórsetýge daıynbyz. Bizde kásipkerlik pen ekonomıkany damytý maqsatynda qolaıly jaǵdaı jasaý úshin barlyq qajetti resýrstar men áleýet bar. Ózderińiz biletindeı, sońǵy 5 jyl ishinde «Moıa ferma» JShS ónimderi bizdiń barlyq aýyl sharýashylyǵy jármeńkelerinde satyldy. Bul — bizdiń aýyl ekonomıkasy men aýyl sharýashylyǵy sektoryn damytýǵa qosyp otyrǵan úlesimizdiń dáleli, — dedi Tselınograd aýdanynyń ákimi Bahydbek Ospanbekov.
«Moıa ferma» kompanııasy sút, aıran, maı, qaımaq, ıogýrt, súzbe tárizdi sútten jasalǵan ekologııalyq taza jáne sapaly ónimderdi shyǵarady.
Búginde zaýyt ónimderin elordadaǵy «Fermag», «Vkýsmart», «Gastronom», «Aqmol», «Ecoshop», «Eco№ 1», «Interfood», «Galmart» dúkenderiniń sórelerinen, sondaı-aq, aýyl sharýashylyǵy ónimderiniń jármeńkesinen kórýge bolady.
Aldaǵy ýaqytta ózge óńirlerdiń naryǵyna shyǵý josparlanǵan.
Aıta ketsek, budan buryn Astanada Aqmola oblysy aýyl sharýashylyǵy taýar óndirýshileriniń jármeńkesi ótkenin jazǵan edik.
