Astanalyq stýdentterge Toqtar Áýbákirovtiń ataýly stıpendııasy berildi

ASTANA. QazAqparat - Elordadaǵy «Turan-Astana» ýnıversıtetinde Keńes odaǵynyń batyry, Qazaqstannyń halyq Qaharmany, synaqshy-ushqysh, zertteýshi-ǵaryshker, general-maıor, tehnıka ǵylymdarynyń doktory, «Turan-Astana» ýnıversıtetiniń professory Toqtar Ońǵarbaıuly Áýbákirovtiń ataýly stıpendııasynyń ıegerlerine kýálikter tapsyrý saltanaty ótti, dep habarlaıdy qala ákimdiginiń saıty.

Ataýly stıpendııany berýdiń maqsaty - oqý, ǵylymı-zertteý qyzmetin yntalandyrý, belsendi ómirlik ustanymyna ıe, qabiletti, daryndy, bastamashyl jáne tártipti kúndizgi bólim stýdentterine materıaldyq qoldaý kórsetý, Toqtar Áýbákirovtiń erlikterin qadirleı bilýge tárbıeleý bolyp tabylady.

Ataýly stıpendııa tabystaý saltanatynda Toqtar Áýbákirovtiń ózi úzdikterge kýálikter, batyrdyń qoltańbasymen ómirbaıandyq kitaptar jáne estelik kádesyılar syıǵa tartty.

Іs-sharaǵa Astana qalasynyń jastar saıasaty máseleleri basqarmasynyń basshysy Ashat Oralov, «Turan-Astana» ýnıversıtetiniń professorlary men stýdentteri qatysty.

«Memleket damýynda jetistikterge jetý úshin elimiz daryndy jastardy qoldaý qajettigin Elbasymyz únemi aıtady. Alty jyldyń ishinde dástúrge aınalǵan is-sharanyń bolashaǵy zor dep senemin. Toqtar Ońǵarbaıulyna jáne «Turan-Astana» oqý ornynyń ujymyna alǵys aıtqym keledi», - dedi Astana qalasynyń jastar saıasaty máseleleri basqarmasynyń basshysy Ashat Oralov saltanatty jıynda. 

Atap aıtqan jón, ataýly stıpendııa 2011 jyldyń 30 tamyz kúni atalmysh oqý orynynyń ǵylymı keńesiniń sheshimimen qurylǵan bolatyn. Ár oqý jyly ataýly stıpendııa tek 5 úzdik stýdentke ǵana beriledi.