Astanalyq polıtseıler kómir qoımasynan 42,5 keli esirtki tapty

NUR-SULTAN. QazAqparat - Elorda polıtseıleri arnaıy operatsııa barysynda iri kólemde esirtki saqtaýshyny ustady, dep habarlaıdy QazAqparat tilshisi Nur-Sultan qalalyq polıtsııa departamentiniń baspasóz qyzmetine silteme jasap.

«Arnaıy jedel operatsııa barysynda elorda aýmaǵynda asa iri mólsherde esirtki zattaryn ótkizýdiń arnasy joıyldy. Mıchýrıno kentindegi jer úıdegi kómir saqtaý qoımasyn tintý kezinde 42 keliden astam «marıhýana» esirtkisi salynǵan 4 qap tabyldy. 53 jastaǵy úı ıesi tabylǵan esirtkige qatysynyń joqtyǵyn aıtty. Jeke tintý kezinde onyń janynan «gashısh» esirtkisi tabyldy. Sondaı-aq, úıretilgen ıttiń kómegimen, 234 gramm «gashısh» esirtkisi zaty bar 35 túıinshek tabyldy», - delingen habarlamada.

Resmı aqparatta aıtylǵandaı, jedel operatsııa nátıjesinde tárkilengen esirtkiniń jalpy salmaǵy 42,5 kelini qurady. Ol 8500 dozany quraıdy jáne onyń qara naryqtaǵy quny 25 mln teńge.

«Qazirgi ýaqytta QR QK 297-baby 3-bóligi boıynsha sotqa deıingi tergeý júrip jatyr. Kúdikti ýaqytsha ustaý ızolıatoryna qamaldy. Elorda aýmaǵynda esirtki jetkizýge jáne ótkizýge qatysy bar basqa kúdiktiler anyqtalý ústinde», - deıdi vedomstvodan.

Osy oraıda qalalyq polıtsııa departamenti esirtki satý, qoldaný, taratýǵa qatysty jaıttar týraly anonımdi senim telefondaryna habarlaýǵa bolatynyn habarlaıdy.

Baılanys telefony kúndiz 71-63-93, táýlik boıy 32-22 -22 nemese 102.

Eske sala ketsek, astanalyq tártip saqshylary buǵan deıin de asa iri kólemde sıntetıkalyq esirtkini jasyrmaq bolǵan er adamdy quryqtaǵan edi.