Astanalyq oqýshylar mektepke avtobýspen jetkiziletin bolady
Bul týraly OKQ-da ótken baspasóz máslıhatynda Astana qalasynyń jolaýshylar kóligi basqarmasynyń basshysy Bekmyrza Igenberdınov osylaı dep málim etti.
«Biz mektepke balalardy tasymaldaý boıynsha jańa model oılastyrdyq. Búgingi kúnge deıin 14 mektep qamtyldy. Bilim basqarmasymen jáne mektep dırektorlarymen bul máseleni talqyladyq. Mektepter qazirgi ýaqytta qaladaǵy jol júıesine qatty áser etetinin atap ótý kerek. Oqý jyly bastalǵanda-aq qalada keptelis kúsheıe túsedi. Ásirese, mektep mańdaryndaǵy kólik qozǵalysy qıyndaıdy. Balalar óte kóp ekenin bilemiz. Joldaǵy bul máseleni sheshý úshin biz kommertsııalyq model oılastyrdyq», - deıdi basqarma basshysy.
Bekmyrza Igenberdınovtyń aıtýynsha, EKSPO kórmesi aıasynda ákelingen avtobýstar osy maqsatta qoldanylýy múmkin.
«Qazirgi kúnniń ózinde birneshe mektepti qamtıtyndaı avtobýstar quramy bar. Bul úshin ata-analarǵa anketa toltyrtyp, belgili bir soma úshin balalardy bilim ordalaryna jetkizý boıynsha kelisip jatyrmyz. Kerekti materıaldar jınalǵannan keıin biz belgili bir baǵdarlardy iske qosa alamyz. Menińshe, bul óte yńǵaıly», - deıdi ol.
Sonymen birge, basqarma basshysy ata-ana mektepke deıingi tasymalǵa belgili bir soma tóleý arqyly balasynyń qaýipsizdikte bolatynyna kóz jetkize alady.
«Mektep avtobýsynyń ishinde valıdatsııa qyzmeti jáne nusqaýshy bolady. Birinshiden, biz áke-sheshelerdi ýaıymnan aryltamyz degenoıdamyz. Balany mektepke aparý, qaıtadan ákelý bile bilsek, aıtarlyqtaı ýaqytpen shyǵyndy talap etedi. Sondyqtan, bul pılottyq jobany jaqyn arada iske qosamyz. Sáıkesinshe, ary qaraı damytamyz. Eń bastysy biz balalardyń ata-analary qanshalyqty bul qyzmetke múddeli ekenin bilip alǵymyz keledi», - dep túıdi basqarma basshysy.
