Astanalyqtar UAE SWAT Challenge jeńimpazdaryn qurmetpen qarsy aldy
ASTANA. KAZINFORM — Astana halyqaralyq áýejaıynda Dýbaıda ótken halyqaralyq UAE SWAT Challenge antıterrorıstik bólimsheleri jarysynyń jeńimpazdary men qatysýshylaryn saltanatty túrde qarsy alý rásimi ótti, dep habarlaıdy Kazinform tilshisi.
Jeńimpazdardy jýrnalıster, áriptesteri jáne týystary qarsy aldy.
Qazaqstannyń bes arnaıy jasaq komandasy – Memlekettik kúzet qyzmeti, Ulttyq qaýipsizdik komıteti jáne Іshki ister mınıstrliginiń bólimsheleri – halyqaralyq týrnırde, áıgili «Arnaıy jasaq Olımpıadasynda» el namysyn qorǵady.
Bul jarys BAE-de 7–11 aqpan aralyǵynda jetinshi ret ótti.
Qazaqstan komandalary jarystyń ár kezeńinde joǵary nátıje kórsetip, 48 eldiń 109 komandasyn artqa qaldyrdy. Jalpy komandalyq esepte Kaz SWAT Team C birinshi orynǵa, al Kaz SWAT Team A ekinshi orynǵa ıe boldy. Bul Qazaqstannyń týrnır tarıhyndaǵy úzdik nátıjelerdiń biri bolyp sanalady.
— Men alǵash ret qatysyp otyrmyn. Eń bastysy este qalǵany – jyldamdyq, kúshti jumys isteý jáne óz-ózimdi baqylaý. Negizgi nátıje start aldynda salqynqandylyqqa baılanysty boldy. Jattyǵýda bári ońaı sııaqty, al jarysta qatelesý nemese qobaljý múmkin – aınalada adamdar men kameralar kóp. Psıhologııalyq daıyndyq óte mańyzdy, komandanyń birligi de úlken ról atqarady. Biz alty aı boıy daıyndaldyq, jyldamdyqqa, arnaıy tehnıkaǵa, júgirýge jáne tózimdilikke erekshe kóńil bóldik, — dedi Kaz SWAT Team C múshesi Mýslım.
Aıta ketý kerek, Tomiris áıelder komandasy týrnırdiń úzdigi atanyp, keıbir erler komandalaryn artqa qaldyrdy. Buǵan deıin de Qazaqstannyń arnaıy bólimsheleri týrnırlerde júldeli oryn alǵan.
Eske salsaq, buǵan deıin Prezıdent Dýbaıda ótken terrorızmge qarsy bólimsheler arasyndaǵy UAE SWAT Challenge-2026 halyqaralyq jarysynda úzdik nátıjege qol jetkizgen qazaqstandyq komandalardy quttyqtady.