Astanalyq balalardyń 96 paıyzy jazǵy lagermen qamtylady
ASTANA. KAZINFORM – Elordanyń bilim berý uıymdarynyń bazasynda 97 mektep janyndaǵy lager, 75 beıindik jáne 21 etno-lager bar.
«Bıyl jazǵy lager jumysyn uıymdastyrý eki baǵyttan turady, saýyqtyrý jáne eńbek etý. Ol ishinara taǵy birneshe baǵytqa bólinedi. Atap aıtqanda, beıindik lager, mektep janyndaǵy lager, etno-lager jáne sporttyq lager. Lagerlerdiń ashylýy jáne jabylýy tálemgerler jáne ata-analardyń qatysýymen saltanatty túrde ótedi. Eńbek etý baǵytynyń ózi ishteı ıntellektýaldy, eńbek, sport jáne shyǵarmashylyq bolyp bólinedi. Eńbek etý boıynsha balalar «Jasyl el» baǵdarlamasy aıasynda kógaldandyrý jumystaryna qolǵabysyn tıgizedi», - dedi Astana qalasy Bilim basqarmasynyń qosymsha bilim berý jáne tárbıe jumysy bóliminiń basshysy Gúlfara Sarambetova BAQ ókilderine arnalǵan baspasóz týry barysynda.
Onyń aıtýynsha, mektep janyndaǵy lagerler joǵaryda atalǵan tórt baǵyt boıynsha balalardyń demalysyn uıymdastyrady.
«Oqýshylar saraıy», mýzykalyq jáne óner mektepterinde balalardyń qatysýymen 1 myńnan astam túrli baǵyttaǵy is-sharalar ótip jatyr. Ol is-sharalar 3 maýsymda bastaldy, 10 tamyzǵa deıin jalǵasady. Mektep janyndaǵy lagerlerde 1-4 synyp oqýshylary barsa, al beıindi lagerlerge kóbine orta býynǵa arnalǵan. Bıylǵy jazǵy lagerlerdiń taǵy bir erekshelegi – kıiz úılerdiń bolýy, ıaǵnı etno-lagerler, ol jerde ata-ájeler kelip, tálim-tárbıe beredi», - deıdi ol.
Jazǵy lagerler jumysyna jalpy sany 1610 pedagog pen tálimger tartylǵan.
«Bıyl bizdiń mektepte birneshe baǵyttaǵy lager ashyldy. Men jas daryndylar lagerin tańdadym. Bul jerde aldymen dostar taptym jáne túrli qoıylymdarǵa qatysyp jatyrmyn. Onyń ishinde sahna men kópshilik aldynda ózińdi ustaı bilýdi úırendim. Basqa da mektep janyndaǵy lagerge kelýge shaqyramyn. Jas daryndylar lagerinde teatr, sheshendik óner, aspazdyq sekildi birneshe úıirme bar. Al týrıstik lagerde qyzyqty kvest ótkizip, Astananyń sáýletti jerlerine saıahattap bardyq», - dedi №79 mekteptiń 6 synyp oqýshysy Aıaýlym Ádil.
Bıyl jazda 200 myń astanalyq bala jazǵy lagermen qamtylmaq jáne ol 5-6 maýsymnan turady.
«Men etno-lager baǵytyn tańdadym, onyń aıasynda biz ulttyq salt-dástúr men qundylyqtardy tereńirek tanyp jatyrmyz. Sonymen qatar mýzeıge saıahattap jáne kınoteatrǵa fılm tamashalaýǵa bardyq. Odan bólek ulttyq taǵamdarmen jaqynyraq tanysyp, daıyndap ta kórdik. Sondaı-aq, sporttyq jarystarǵa, vıktorınalyq saıystarǵa qatysyp, jeńimpaz atandyq», - deıdi №79 mekteptiń oqýshysy Ildar Abylaıhanov.
