Astanaǵa sheteldik jumys kúshi kóbine qaı elden keledi

ASTANA. KAZINFORM – Bıyl elordada sheteldik jumysshylardy tartýǵa arnalǵan kvota sany azaıdy. Bul týraly Astana qalasy jumyspen qamtý jáne áleýmettik baǵdarlamalar basqarmasynyń basshysy Ilıa Skýb málim etti.  

«Ótken jyly elordaǵa shetelden jumys kúshin tartýǵa 1331 kvota bólindi. Onyń ishinde 820 kvota berildi. Sheteldik jumysshylardyń 91,2 % jetekshiler jáne bilikti mamandar. Sonymen qatar, óz salasynyń І sanattaǵy jumysshylarǵa 97 kvota, ІІ sanat 225, III sanat 432 jáne IV sanattaǵy sheteldik jumysshylarǵa 66 kvota berildi», - dedi Ilıa Skýb elorda máslıhatynyń otyrysynda.

Astanaǵa shetelden tartylatyn mamandardyń kóbisi qurylys salasyna tıesili 56 % (853), odan keıin kásibı ǵylym jáne tehnıkalyq qyzmet 8,6 % (132), bilim 6,6 % (101), odan bólek ártúrli qyzmetterdiń úlesi 6,2 % (95).

«Byltyr qazynaǵa 400 000 000 teńge salyq tólendi. Elordadaǵy jumysshylardyń 96%-y óz azamattarymyz. Shetelden keletin mamandar sanyna kelsek, Serbııa 808, Túrkııa 209, Qytaı 151 jáne Ýkraınadan 107 sala mamanyna kvota berildi», - deıdi ol.

Onyń aıtýynsha, bıyl shetel azamattaryn elimizde eńbek etýge 1191 kvota bólindi.