Astanaǵa flývır men flýkaptyń 4 myńnan astam qoraby jetkizildi

ASTANA. KAZINFORM – Densaýlyq saqtaý mınıstrligi Medıtsınalyq jáne farmatsevtıkalyq baqylaý komıtetiniń tóraǵasy Baýyrjan Júsipov ortalyq kommýnıkatsııalar qyzmetinde ótken baspasóz máslıhatynda tumaý maýsymy bastalǵannan beri suranysy artqan flývır jáne flýkap preparatynyń memleket bekitken shekti baǵasy bar ekenin málim etti.

- Astanada flýkap jáne flývır perparatynyń tapshylyǵy týraly shaǵym kóp aıtylyp jatyr. Qalaı sheship jatyrsyzdar? - dep surady BAQ ókili.

Komıtet basshysy atalǵan dárilerdi qandaı jelilerden satyp alýǵa bolatynyn aıtty.

- Jalpy vırýsqa qarsy, dene qyzýyn túsiretin dári-dármektiń qory jetkilikti mólsherde. Biraq sońǵy kúnderi siz ataǵan eki preparatqa óte úlken suranys týyndap jatyr. Sol sebepten biz dárihanalarmen kelissóz júrgizdik. Qazir dárihanalar qosymsha partııalar ákelip jatyr. Bizge túsken aqparat boıynsha búgin Astana qalasyndaǵy Zerde, «Medservıs+», «Amanat» sııaqty iri dárihana jelileri osy dárilerdi alyp keldi. Dárihanalarǵa taratyp jatyr. Basqa dárihanalarǵa da osy dárilerdiń qoryn jasaý týraly usynys bergenbiz, - dedi ol.

Aıtýynsha, atalǵan dárilerdi qazaqstandyq zaýyttar da shyǵarady.

- Negizi bul flývır men flýkap Úndistannan shyǵady. Bizdiń otandyq óndirýshiler de osy preparatty shyǵarady. Astanada qazir birneshe dárihanada atalǵan dáriler bar. Іri dárihana jelileri qosymsha tapsyrystar berip jatyr. Mendegi aqparat boıynsha qazir Astana qalasynda atalǵan dárilerdiń 4-5 myń qoraby bar. Bul dárilerdiń shekti baǵasy bekitilgen. Sol dálizde satylý kerek. Eger shekti baǵadan joǵary bolsa, bizdiń komıtettiń jergilikti departamentterine shaǵym túsire alady. Sol shaǵym boıynsha tekseremiz, - dedi ol.

Buǵan deıin Densaýlyq saqtaý mınıstri Aqmaral Álnazarova bıyl vırýstardyń órshýi jeltoqsannyń ortasyna deıin jalǵasýy múmkin ekenin aıtqan edi.