Astanadan kóktemde 1400 ulan áskerge shaqyrylady
ASTANA. KAZINFORM — Astanada merzimdi áskerı qyzmetke kóktemgi shaqyrý naýqany 16 naýryzda bastalyp, 30 maýsymǵa deıin jalǵasady.
Bul jóninde Astana qalasynyń Qorǵanys isteri departamentiniń bastyǵy, polkovnık Rýslan Baltemırov qalalyq kommýnıkatsııalar qyzmetinde ótken brıfıngte málimdedi.
— QR Prezıdentiniń 2026 jylǵy 14 naýryzdaǵy № 1202 Jarlyǵyna sáıkes sonymen qatar Astana qalasy ákiminiń qaýlysyna sáıkes azamattardy kóktemgi áskerge shaqyrý naýqany bastaldy. Maýsym aıynyń 30 deıin áskerge shaqyrýdy keıinge qaldyrýǵa nemese bosatýǵa negizderi joq, jasy 18-den 27-ge deıingi 21 myńnan astam azamatty áskerge shaqyrý josparlanyp otyr. Shaqyrý naýqany qoldanystaǵy zańnamaǵa sáıkes uıymdastyrylyp, jergilikti atqarýshy organdardyń baqylaýynda bolady, — dedi Rýslan Baltemırov.
Spıkerdiń sózinshe, Astana qalasynan áskerı bólimderge 1 400-den astam azamat jiberiledi. Onyń ishinde 788 sarbaz Qazaqstan Qarýly Kúshteriniń qataryna qosylady, 450-i Ulttyq ulanǵa, 120-sy UQK Shekara qyzmetine attanady. Qalǵan azamattar ózge de áskerı qurylymdarǵa barady.
Aıta keteıik, áskerı qyzmetten jaltarǵan azamattar zań aıasynda jaýapkershilikke tartylady.
— Shaqyrý qaǵazyn alǵanyna qaramastan, sebepsiz kelmegen tulǵalarǵa Qazaqstan Respýblıkasynyń Ákimshilik quqyq buzýshylyq týraly kodeksiniń 647-babyna sáıkes ákimshilik jaýapkershilik qarastyrylǵan. Al áskerı qyzmetten ádeıi jaltarǵan jaǵdaıda, Qazaqstan Respýblıkasynyń Qylmystyq kodeksiniń 387-babyna sáıkes qylmystyq jaýapkershilik kózdelgen. Mundaı quqyq buzýshylyq úshin 1000 aılyq eseptik kórsetkishke deıin aıyppul salý nemese bir jylǵa deıin bas bostandyǵynan aıyrý jazasy qarastyrylǵan, dedi — Astana qalasynyń Qorǵanys isteri Departamenti bastyǵynyń orynbasary Ánýar Áýbákirov.
Eske salaıyq, jaqynda bir top aqtóbelik áskerı boryshyn óteýge attandy.