Astanadan Qytaıǵa jańa áýe baǵyty ashylady
ASTANA. KAZINFORM – Qazaqstan Kólik mınıstrligi ushý geografııasyn keńeıtý jáne qoldanystaǵy baǵyttar boıynsha reıster sanyn arttyrý jumystaryn turaqty negizde júrgizip keledi.
Osyǵan oraı, osy jyldyń 2 maýsymynan bastap qazaqstandyq «Air Astana» áýe kompanııasy Qytaıǵa jańa áýe baǵytyn – Astana – Gýanchjoý marshrýtyn ashýdy josparlap otyr.
Azamattyq avıatsııa komıteti málimetinshe, reıster aptasyna 2 ret «Airbus A321LR» úlgisindegi áýe kemelerimen oryndalady.
Atalǵan áýe qatynasynyń ashylýy eki el arasyndaǵy saýda-ekonomıkalyq, iskerlik jáne týrıstik yntymaqtastyqtyń odan ári damýyna yqpal etedi dep josparlanǵan.
Aıta keteıik, maýsym men qyrkúıek aralyǵynda Astana men Almatydan Kıprdiń ońtústik jaǵalaýyndaǵy Larnaka qalasyna turaqty áýe reısteri ashylady.
2026 jyly Qazaqstannyń ishindegi áýe reısteriniń sany artady. Bul týraly Parlament Májilisi janyndaǵy Qoǵamdyq palata otyrysynda Kólik mınıstrligi Azamattyq avıatsııa komıtetiniń tóraǵasy Saltanat Tompıeva málim etti.