Astanadan Bratıslavaǵa tikeleı reıs ashylýy múmkin

ASTANA. KAZINFORM — Qazaqstannyń Slovakııadaǵy elshisi Janna Saǵynova Bratıslavadaǵy M. R. Shtefanık atyndaǵy halyqaralyq áýejaıdyń bas dırektory Dýshan Novotamen kezdesip, Astana-Bratıslava baǵytynda tikeleı reıs ashý múmkindigin talqylady.

Elshi áýejaı basshylyǵyn QR Úkimetiniń avıatsııa salasyn jańǵyrtý, alty halyqaralyq áýe habyn damytý, sondaı-aq ulttyq júk áýe tasymaldaýshysyn iske qosý jónindegi sharalarymen tanystyrǵan. 

Qazaqstanda «ashyq aspan» rejıminiń engizilýi jáne «áýe erkindiginiń» besinshi dárejesiniń qoldanylýy sheteldik áýe kompanııalarynyń qazaqstandyq naryqqa shyǵýyna qolaıly jaǵdaı jasap, azamattyq avıatsııa salasynda básekeni arttyrýǵa ári áýe baǵyttarynyń geografııasyn keńeıtýge múmkindik beretini atalyp ótti. 

Al Qazaqstan óziniń tıimdi geografııalyq ornalasýy men áleýetiniń arqasynda Eýropa men Azııa naryqtaryn baılanystyratyn jolaýshylar men júk tasymaly aǵynyn qamtamasyz etýde mańyzdy dáneker bola alatyny nazarǵa alyndy.

— Slovakııa tarapyna júk áýe tasymaldaryn uıymdastyrý, sondaı-aq eýropalyq áýe kompanııalarynyń shyǵysqa baǵyttalǵan reısterinde Qazaqstan áýejaılaryn tranzıttik jáne qosalqy áýejaı retinde paıdalaný múmkindigin qarastyrý usynyldy. Qazaqstan Slovakııa azamattary úshin Ortalyq jáne Ońtústik-Shyǵys Azııaǵa saparlar barysynda qolaıly tranzıttik torap qyzmetin atqara alatyny aıtyldy. Taraptar tikeleı áýe qatynasyn ornatý ózara saýda, iskerlik baılanystar jáne týrıstik aǵyndardyń keńeıýine serpin beretini jóninde ortaq pikirge kelip, aldaǵy yntymaqtastyqqa daıyn ekendikterin rastady, — dep jazylǵan QR SІM málimdemesinde.

Aıta keteıik, 2030 jylǵa qaraı Qazaqstan áýe tasymalyn 26 mıllıon jolaýshyǵa jetkizýdi josparlap otyr. Tranzıttik jolaýshylar sanyn 338 myńnan 1,1 mıllıonǵa deıin úsh ese arttyrý kózdelgen. Bul batyl maqsat Qazaqstannyń óńirdegi iri avıatsııalyq hab retindegi rólin nyǵaıtady.

Sondaı-aq, Qazaqstan men Iordanııa arasynda tikeleı áýe reısi ashylýy múmkin.