Astanadaǵy jekemenshik balabaqsha ıeleri Oqý-aǵartý mınıstrliginiń buıryǵyna narazy
Balabaqsha ıeleri vedomstvonyń №381 buıryǵy kásipkerlerdiń pikirin eskermesten, qoǵam talqylaýyna shyǵarylmastan kúshine engizildi dep esepteıdi.
Buıryqtaǵy talapty oryndaý úshin kásipkerlerge 1 aıdan az ýaqyt qana qalǵan.
Eger 1 qańtarǵa deıin talap oryndalmasa, ondaǵan balabaqsha memlekettik tapsyrystan qaǵylyp, jumys isteý múmkindiginen aırylýy múmkin.
Onyń saldarynan 20 myńǵa jýyq bóbek balabaqshasyz qalýy yqtımal kórinedi.
Jekemenshik balabaqsha ıeleriniń shaǵymyn Astana qalasy kásipkerler palatasynyń dırektory Beısen Jolboldıev túıindep túsindirdi.
«Astana qalasynda shamamen 300-ge jýyq jeke balabaqsha bar. Tamyz aıynyń aıaǵynda Oqý-aǵartý mınıstrliginiń №381 buıryǵy kúshine endi. Ol qujat boıynsha árbir balabaqsha medıtsınalyq kabınetti lıtsenzııalaý kerek. Al ondaı lıtsenzııa alý úshin kótpegen kedergiler bar. Atalǵan jeke balabaqshalar jeltoqsan aıynda medıtsınalyq kabınetterin №381 buıryqtyń talaptaryna tolyǵymen sáıkestendirip, bilim basqarmasyna esebin bermese, kelesi jyldan bastap keminde 20 myńǵa jýyq balabaqsha tárbıelenýshisine memlekettik grantsyz qalý qateri týyndap tur», - deıdi palata ókili.
Sondaı-aq, ol mundaı talap Prezıdenttiń bıznestiń damýyna kedergi keltirmeý týraly tapsyrmasyna qaıshy dep esepteıdi.
«Bizdiń oıymyzsha, kez kelgen bastama bızneske kedergi keltirmeý kerek. Kezinde jeke balabaqshalar ashylǵanǵa deıin bular memleketke kómek berdi. Astana qalasyndaǵy balalardyń 50 paıyzy jeke balabaqshalarda tárbıe alyp keldi. Olardy shekteıtin bolsaq, ár balabaqshanyń artynda ata-analar tur. Odan bólek balabaqsha ashqan kásipkerlerdiń bank aldynda kredıti bar. Odan bólek qanshama jumys ornyn qamtamasyz etip otyr. Sondyqtan bul buıryq kásipkerlerdiń jumysyna keri áser etip, ári qaraı damýyna múmkindik bermeıdi. Árıne, olar medıtsına kabınetterin talapqa saı jabdyqtaýǵa daıyn. Biraq vaktsına salatyn arnaıy jáshik ornatý, ol jáshikterdi zalalsyz kádege jaratý sııaqty talaptar úlken kedergi. Ondaı talaptyń balabaqshaǵa qajeti qansha? Qaı ata-ana balabaqshada balasyna vaktsına salýǵa ruqsat beredi? Onyń bári úlken másele. Bizdiń oıymyzsha buıryqty qoldanysqa engizer aldynda oılaný kerek edi», - dedi Beısen Jolboldıev.
Kásipkerlerdiń suraǵyna jaýap bergen qalalyq bilim basqarmasy basshysynyń orynbasary Rımma Imanǵazınova men qalanyń bas sanıtar dárigeri Sarhat Beısenova bul máselede túpkilikti sheshim qabyldaıtyn quzyreti joq ekenin aıtty.
Jıyn qorytyndysy boıynsha Astana kásipkerleriniń quqyǵyn qorǵaý jónindegi keńestiń atynan Oqý-aǵartý mınıstrligine tıisti hat joldaý jóninde sheshim qabyldandy.
