Astanadaǵy Ulttyq kitaphanaǵa jastar myńdap kele bastady - Úmithan Muńalbaeva
«Men bir kezderi Oństústik Koreıanyń kitaphanalaryn aralap, bizdiń de kitaphanaǵa jastardy kóptep kelse dep armandaıtynmyn. Endi mine, demalys kúnderi tań atpaı myńdaǵan jastardyń kitaphanamyzǵa aǵylyp jatqanyn kórip, qýanyp júrmin. Bizdiń kitaphanaǵa demalys kúnderi kóptegen jastar jınalady. Senbeseńizder, kelip kórseńizder bolady», - deıdi kitaphana dırektory.
Elimizde birinshi ret ótken ádebı-sazdy kesh týraly aıta kele Úmithan Muńalbaeva sharaǵa daıyndyqtyń qyzý júrgenin atap ótti.
«Biz jumystan keıin arnaıy jınalyp, daıyndyq jumystaryn júrgizdik. Sondyqtan, osynaý lırıkalyq keshti uıymdastyryp otyrmyz. Áleýmettik jeli arqyly barlyq Astana turǵyndary men meımandary shaqyryldy. Meniń oıymsha, bizdiń mádenıet qyzmetkerleri bir sátke tynyǵyp, keshte kóńil kóterýge laıyqty», - deıdi ol.
Sonymen qatar, Ulttyq akademııalyq kitaphana dırektory keshti ótkizý bastamasy qalaı týyndaǵany týraly oıymen bólisti.
«Bizdiń ıdeıamyz qashan da kóp. Men kezinde «Atameken» kesheniniń dırektory bolyp júrgen kezimde biz bir kezde ashyq aspan astynda kontsert ótkizgenbiz. Biz ol keshke Qazaqstannyń túkpir-túkpirindegi aqyn-jazýshylardy shaqyrǵan edik. Osy keshke qatysty, aıtarym bizdiń dostarymyz kóńil kúıin kóterip qaıtar degen senimdemiz», - deıdi Úmithan Muńalbaeva.
Aıta ketsek, búgin Astanadaǵy «Qazaqstan» kontsert zalynda el tarıhyndaǵy tuńǵysh ádebı-sazdy bal ótkizilgen bolatyn. Elorda turǵyndary úshin umytylmas keshti QR Ulttyq akademııalyq kitaphanasynyń ujymy uıymdastyryp otyr. Aıtýly sharanyń «ádebı -sazdy» dep atalýy da tegin emes. «Qazaqstan» kontsert zalynyń záýlim ári keń foıesine kitaphana ujymy «Rýhanı jańǵyrý» baǵdarlamasymen úndes oqýlyqtardyń kórmesin ótkizdi.
