Astanadaǵy úlken dańǵylǵa ál-Farabıdiń esimi berilmek

ASTANA. QazAqparat – Búgin elorda maslıhatynda ótken turaqty qoǵamdyq tyńdaýda uly ǵalym, álemniń ekinshi ustazy atanǵan ál-Farabıdiń esimimen atalǵan qala shetindegi shaǵyn kóshege qatysty másele kóterildi, dep habarlaıdy QazAqparat tilshisi.

Málim bolǵandaı, ónerkásip aýmaǵyndaǵy kóshege ál-Farabı esimin berý sheshimin buǵan deıingi shaqyrylym depýtattary qabyldaǵan.

Maslıhat hatshysy Erlan Kanalımovtyń aıtýynsha, álemdik deńgeıdegi tulǵanyń atyn qala ortalyǵyndaǵy kóshelerdiń birine berý oryndy bolady.

«Ál-Farabı kóshesi qalanyń syrtyna berilip qoıdy. Ol tek bizdiń elimizdiń ǵana emes, álemdik tulǵa. Ónerkásiptik zonadaǵy túsiniksiz bir kósheni berdik te qoıdyq. Ózimizdi ózimiz tyǵyryqqa tirep otyrmyz. Sondyqtan úlken tulǵalardyń esimin bergende saq bolyp, durys sheshim qabyldaý kerek», - dedi Erlan Kanalımov.

Bul usynyqa qatysty pikir bildirgen Astana qalasy Tilderdi damytý jáne arhıv isi basqarmasynyń basshysy Sáken Esirkep qala ortalyǵyndaǵy úlken kósheniń birin uly ǵalymnyń esimimen ataý máselesi qarastyrylyp jatqanyn atap ótti.

«Bul boıynsha Mádenıet jáne sport mınıstrligimen ákimniń deńgeıinde ony №38 kóshege kóshirý boıynsha aqyldasyp jatyrmyz. Mınıstrlik barynsha qoldaý kórsetýge daıyn ekenin aıtty. Biz muny aldaǵy onomastıka otyrystaryna engizýge tyrysamyz. Jospar boıynsha, qabyldanady dep otyrmyz. Ol Táýelsizdik dańǵylynan Qabanbaıǵa deıin baratyn úlken dańǵyl bolady», - dep málim etti basqarma basshysy.

Eske sala keteıik, búgin máslıhatta ótken turaqty qoǵamdyq tyńdaýda bas shahardaǵy 12 kóshege tarıhı tulǵalardyń esimin berý usynylǵan bolatyn.

Buǵan qosa, maslıhat hatshysy Erlan Kanalımov ataý berilgen kóshege aqparattyq stendter ornalastyrý máselesin kóterdi.