Astanadaǵy kópbalaly otbasylarǵa arzan baspana beriledi
Qurylys jáne turǵyn úı-kommýnaldyq sharýashylyq isteri komıtetiniń tóraǵasy Marxabat Jaıymbetovtyń aıtýynsha, búginde respýblıka boıynsha 340 000 kópbalaly otbasy bar. Sonyń ishinde 28 126 otbasy baspana kezeginde tur. Al Astana qalasynda 2 888 kópbalaly ana resmı kezekke tirkelgen.
«Elordada kópbalaly otbasylarǵa baspana salý úshin jyl saıyn 5,1 mıllıard teńge bólinetin bolady. Ol jylda 616 páter salynady degen sóz. Al jeti jyldyń ishinde 35,9 mıllıard teńgeniń bólinetinin eskersek, elordada 4 107 páter salynady. Bul - jalǵa beriletin arendalyq úıler», - dedi M.Jaıymbetov Astanadaǵy kópbalaly analarmen bolǵan kezdesýde.
Komıtet basshysynyń sózine qaraǵanda, jeti jyldyń ishinde respýblıka boıynsha arendalyq páter qurylysyna 350 mıllıard teńge bólinedi. Sonyń arqasynda 42 000 páter salynady degen jospar bar.
«Qazir aımaqtar arasynda kezekte turǵan kópbalaly otbasylardyń sany jaǵynan Astana Túrkistan men Almaty oblystarynan keıin tur. Bul degenimiz, resmı túrde kezekte turǵan azamattardyń 10,3 paıyzy Astanada turady. Aǵymdaǵy jyly mamyr aıynda respýblıka boıynsha 2 000 arendalyq páter kópbalaly otbasylarǵa beriletin bolady. Sonyń ishinde Astana qalasynda 150-200 arendalyq páter taratylady degen josparymyz bar», - dep atap kórsetti M.Jaıymbetov.
Buǵan deıin QazAqparat tilshisi Qazaqstandaǵy jaldamaly páterler qurylysyn zerdelep, kópbalaly otbasylarǵa arnalǵan baspanany jalǵa berýdiń esep-qısabyn saraptap shyqqan bolatyn. Ondaı baspananyń bir aılyq tólemaqysy shamamen 7-9 myń teńge bolady degen boljam da bar.
Aıta keteıik, búgin QR Indýstrııa jáne ınfraqurylymdyq damý mınıstrligi kópbalaly otbasylarǵa 2 protsenttik ıpotekany berý sharttaryn jarııalady. Turǵyn úı qurylys jınaq bankinen 8 mıllıon teńge qaryzǵa alynsa, alǵashqy 8 jylda aı saıyn 42 000 teńgeden tóleý kerek. Al odan keıingi 11 jylda atalǵan soma 27 000 teńgege deıin tómendeıdi.
«Jeńildetilgen baspana nesıesine jańa páter, bolmasa, úı satyp alýǵa bolady. Jyldyq mólsherlemesi - 2 protsent. Ol 19 jylǵa beriledi. Sosyn 10 paıyz kóleminde alǵashqy jarna salý qajet. Endi, alǵashqy jarnaǵa aqsha joq degen másele týyndaıdy. Máselen, 10 mıllıon teńgeni qaryzǵa alsań, 1 mıllıon teńge kóleminde alǵashqy jarna qajet. Biz bul máseleni bylaı sheshýdi kózdep otyrmyz. Ákimdikter beretin turǵyn úı kýálikteri arqyly, bolmasa, iri kásiporyndardyń kómegimen alǵashqy jarnany alýǵa bolady. Máselen, Astana qalasy turǵyn úı kýálikterine 2 mıllıardtan astam qarjy bólemiz dep otyr. Sonyń kómegimen alýǵa bolady», - deıdi M.Jaıymbetov.
Onyń aıtýynsha, jeńildetilgen ıpotekany baı-aýqatty adamdar alyp ketpes úshin 2 protsenttik ıpoteka boıynsha jalaqynyń shekti mólsheri bekitildi.
Tutynýshylyq kredıti bar otbasylarǵa da jeńildetilgen turǵyn úı nesıesi beriledi.
