Astanadaǵy «jaıly mektepterdiń» kóbi sol jaǵalaýda salynady
ASTANA. KAZINFORM – Elordadaǵy «Jaıly mektep» jobasy boıynsha salynatyn mektepterdiń basym bóligi Esil jáne Nura aýdandarynda boı kóteredi.
«Oqýshy oryndarynyń tapshylyǵy máselesin sheshý úshin ótken jyly 12 mektep salyndy. Qazirgi tańda eki aýysymda 102 myń oqýshy ornyna arnalǵan 34 mekteptiń qurylysy júrip jatyr. Onyń 27-si (eki aýysymda 74 myń oryn) jyldyń sońyna deıin paıdalanýǵa beriledi. Onyń ishinde 3 mektep — jekemenshik, 7 mektep — memlekettik jáne 17 bilim ordasy „Jaıly mektep“ jobasy aıasynda salynyp jatyr. Atalmysh mektepter barlyq aýdandardy qamtıtyn bolady. Atap aıtsaq, Esil aýdanynda 10 mektep, Nura aýdanynda 7 mektep, Baıqońyr aýdanynda 2 mektep, Almaty aýdanynda 6 mektep, Saryarqa aýdanynda 2 mektep ashylady. 27 mekteptiń 17 mektebi qyrkúıek aıynda paıdalanýǵa beriledi dep josparlanyp otyr. „Jaıly mektep“ jobasy aıasynda barlyǵy 90 myń oqýshyǵa arnalǵan 24 mektep salynady. Onyń 15-i qarqyndy damyp kele jatqan Esil men Nura aýdandarynda ornalasady», — dedi Astana qalasy bilim basqarmasynyń Kazinform saýalyna bergen jaýabynda.
Jaýapta qazir qala boıynsha 102 myń oqýshyǵa arnalǵan 34 mektep salynyp jatqany aıtylǵan.
«Bıyl 27 mektep paıdalanýǵa beriledi. Astana qalasynda 263 myńnan astam oqýshyny qamtıtyn 175 orta bilim berý uıymy bar. Onyń ishinde 102 mektep — memlekettik, 66 mektep — jekemenshik, 7 mektep — respýblıkalyq. Oryn tapshylyǵyna baılanysty qalamyzda 8 úsh aýysymdy jáne bala sany shamadan kóp 16 mektep jumys isteıdi», — dep jazylǵan resmı jaýapta.
Buǵan deıin Astana qalalyq bilim basqarmasynyń basshysy Qasymhan Senǵazıev elordadaǵy úsh aýysymdy bilim oshaqtarynyń ishinde orys tilinde bilim beretin mektep joq ekenin aıtqan bolatyn.
