Astanadaǵy Taldykólde qandaı jumys júrgizilip jatyr
ASTANA. KAZINFORM — Astanadaǵy Kishi Taldykól kóli retke keltiriledi. Buǵan deıin jaqyn mańdaǵy aýdan turǵyndary jańbyrdan keıingi batpaqty ıiske shaǵymdanǵan edi.
Ekologııa mınıstrliginiń dereginshe, Kishi Taldykól aınalasyndaǵy belsendi qurylys, kóldiń jasandy túrde qurǵatylýy jáne lastanýy jáne Kishi Taldykól ekojúıesin basqarýda keshendi tásildiń bolmaýy sekildi birqatar másele áli de saqtalyp otyr.
Ekologııa mınıstrligi «SOS Taldykol» qoǵamdyq birlestigimen birge kólder tobyn saqtaý jáne qalpyna keltirý boıynsha jol kartasyn ázirlep, ony qala ákimdigine qaraýǵa jibergen.
Byltyr «Elorda Eco System» kompanııasy kólge las sý aǵyzǵany úshin 1 476 800 teńge kóleminde aıyppul tólegen.
Qazirgi ýaqytta Ýrbanıstıka ortalyǵynyń qatysýymen jumys toby qurylyp jatyr. Bul topqa «SOS Taldykol» uıymynyń ókilderi men brıtandyq LDA Design kompanııasynyń mamandary kirdi. Olar № 5 jáne № 7 ýchaskelerdi egjeı-tegjeıli zerttep, abattandyrý jospary men ekologııalyq sheshimderdi ázirleıdi. Jobany 2025 jyldyń ekinshi toqsanynda aıaqtaý josparlanyp otyr.
Kóldi tazartý boıynsha ákimdik ótkizgen tenderde «Arǵyn Stroı 2015» JShS jeńimpaz bolǵan. Kelisimshart somasy — 267 mıllıon teńge.
Aıta keteıik, Kishi Taldykól — jaı ǵana sý aıdyny emes, elordanyń mıkroklımatyna áser etetin mańyzdy ekojúıe, bıologııalyq alýantúrliliktiń kózi jáne sırek qustardyń mekendeıtin orny. Kól jerasty sýlarynyń deńgeıin retteýge kómektesip, qolaıly qalalyq ortanyń qalyptasýyna yqpal etedi. Belsendilerdiń pikirinshe, kóldi qurǵatý men qurylys júrgizý klımattyń nasharlaýyna, shańdy daýyldardyń jıileýine jáne sý tapshylyǵyna ákep soǵady.
2022 jyly sot Ekologııa, geologııa jáne tabıǵı resýrstar mınıstrliginiń mamandaryna kólder tobyn zertteýdi tapsyrǵan. Mamandar qorytyndysy boıynsha, kólder toby shartty túrde 9 ýchaskege bólingen. 1 jáne 2-ýchaskeler — Úlken Taldykól. Kishi Taldykólge qatysty: 3, 4, 5 jáne 8-ýchaskeleri qurǵatylǵan jáne ishinara qurylys júrgizilgen. Ol kezde áleýmettik nysandar men turǵyn úılerdiń qurylysy júrip jatqan.
Keıin Qazaqstannyń bıolýantúrlilikti saqtaý qaýymdastyǵynyń mamany Kishi Taldykóldi áli de saqtap qalýǵa bolatynyn aıtyp, bul aýmaqta tirkelgen flora, faýna túrlerin atady.