Astanadaǵy LRT bıyl synaqtan ótkennen keıin paıdalanýǵa beriledi

ASTANA. KAZINFORM – Astana ákimdiginiń málimetinshe, joba qazirgi ýaqytta synaq kezeńinde, jumystar kestege sáıkes júrip jatyr.

Budan basqa, LRT tarıfteriniń máziri ázirlenip jatyr, ol týraly paıdalanýǵa berilmes buryn habarlanady. 

- Synaqtar aıaqtalǵan soń bıyl LRT júıesi aǵymdaǵy jyly paıdalanýǵa berilip, elordany tolyǵymen avtomattandyrylǵan jáne júrgizýshisiz kelesi býyn kóligimen qamtamasyz etedi. LRT jalpy uzyndyǵy – 22,4 shaqyrym. Jeli quramynda 18 stantsııa bar. Baǵdar elordanyń negizgi kósheleri men aýdandary arqyly ótedi. Ol halyqaralyq áýejaıdan bastalyp, Qabanbaı batyr dańǵyly boıymen ótedi jáne «Astana Juldyzy» aınalma jolynan, Nazarbaev ýnıversıtetinen jáne Botanıkalyq baqtan ótedi. Sodan keıin jeli Syǵanaq kóshesine burylyp, «Abý-Dabı Plaza» kópfýnktsıonaldy kesheni men Mınıstrlikter úıi janynan ótip, Arys kópiri men Qaldaıaqov kóshesin kesip ótip, Ulttyq murajaı janynan ótedi. Sońǵy aıaldama – «Nurly jol» stantsııasy, - dep jaýap berdi Astana ákimdigi.

Sondaı-aq LRT jobasynyń ekinshi kezegine arnalǵan tehnıkalyq-ekonomıkalyq negizdeme men jobalyq-smetalyq qujattamany ázirleý aıasynda topyraqtyń quramy men qasıetterin anyqtaý úshin Sh. Aıtmatov kóshesi boıynda ınjenerlik-geologııalyq zertteýler júrgizilip jatqany belgili. 

Sonymen qatar, elordada qoǵamdyq kólik jolaqtarynyń arnaıy júıesin (Bus Lane) damytý ázirlenip jatyr, bul jol júrý ýaqytyn 10-15%-ǵa qysqartýǵa jáne kóshe-jol jelisindegi jalpy keptelisti azaıtýǵa múmkindik beredi. 

- Qazirgi ýaqytta qalada jalpy uzyndyǵy 1091 km bolatyn 1341 kóshe bar. Osylaısha, 43 kóshede Bus Lane engizý múmkindigi bar. Qazirgi ýaqytta jalpy uzyndyǵy 140 km bolatyn 31 ýchaskede arnaıy jolaqtar bar, - dep habarlady ákimdik.

Budan basqa, qoǵamdyq kólik parki jyl saıyn jańartylyp keledi. 2023 jyly 400 avtobýs, 2024 jyly 305 avtobýs jáne 2025 jyly – 422 avtobýs satyp alyndy. Sonymen qatar qoǵamdyq kólik qyzmetteriniń qoljetimdiligi men sapasyn jaqsartý maqsatynda jańa baǵyttardy ashý jáne qoldanystaǵy baǵyttarda avtobýstar sanyn kóbeıtý jumystary júrgizilip jatyr. 

Buǵan deıin Astanada LRT jobasynyń ekinshi kezeńine daıyndyq bastalǵanyn jazǵan bolatynbyz.