Astanadaǵy bıznes ortalyqtar janyndaǵy aqyly turaqtar jabylmaıdy

ASTANA. KAZINORM – Astana ákimdigi qaladaǵy bıznes ortalyqtar janynda ashylǵan aqyly turaqtardy jabýdy josparlap otyrǵan joq.

Buǵan deıin elorda ákimi Jeńis Qasymbektiń kásipkerlermen kezdesýinde bıznes-ortalyqtardyń keıbir ıesi nysan janyndaǵy aqyly kólik turaqtary kelýshiler legine teris yqpal etetindigin aıtyp, shaǵym jasaǵan bolatyn. Osydan keıin elorda ákimdigi bıznes ortalyqtar aýmaǵyndaǵy aqyly turaqtardy jabý máselesi qarastyrylatyndyǵyn málimdegen edi. Atalǵan máselege oraı ákimdikke resmı saýal joldaǵan bolatynbyz.

«Keıbir bıznes ortalyqtardyń janyndaǵy turaqtarǵa qatysty ózgerister josparlanyp otyrǵan joq», - dep jaýap berdi ákimdikten agenttik saýalyna oraı.

Degenmen, ákimdik málimetinshe, ótken jyldyń qarashasynda «Astana avtoturaq keńistigi» JShS-ine qalanyń áleýmettik nysandary aýmaǵyndaǵy aqyly turaqtardy alyp tastaý týraly tapsyrma berilgen. Sonyń nátıjesinde myna ýchaskelerdegi aqyly turaqtar joıyldy:

Sáken Seıfýllın kóshesi, 21, 28 úı aýmaǵy;

Respýblıka dańǵyly, 40 úı aımaǵy;

Álibı Jangeldın kóshesi, 28 úı aımaǵy;

Abaı dańǵyly, 19 úı aımaǵy;

Yqylas Dúkenuly, 32 úı aımaǵy;

Dinmuhamed Qonaev kóshesi, 33/1 úı aımaǵy;

Talǵat Bıgeldınov kóshesi, 6A úı aımaǵy;

Muhtar Áýezov kóshesi, 9 úı aımaǵy.