Astanadaǵy áskerı paradqa qatysyp jatqan ushaqtar týraly ne bilemiz
ASTANA. KAZINFORM — Jeńistiń 80 jyldyǵyna arnalǵan áskerı paradqa áýeden 66 ushý apparaty qatysty. Kazinform osy áýe tehnıkalaryna sıpattama usynady.
Qazaqstan Respýblıkasynyń Memlekettik Týy men Qarýly Kúshterdiń Týyn alyp ushqan – Mı-171 tikushaqtary.
Ortasha kóp maqsatty Mı-17 tikushaǵy óziniń ámbebaptyǵy men bıik ushatyn qabiletiniń arqasynda álemdegi eń keń taralǵan tikushaqtardyń biri bolyp sanalady.
Ol Qurlyq áskeri bólimsheleriniń utqyrlyǵyn arttyryp, qarý-jaraq pen jeke quramdy jetkizýge, sondaı-aq berilgen nysanalardy joıýǵa arnalǵan. Sondaı-aq, taýly mekenderde jáne joǵary temperatýrada jaýyngerlik tapsyrmalardy oryndaýǵa qaýqarly.
Mı-35M jaýyngerlik tikushaǵy urys dalasyndaǵy atysta Qurlyq áskerin áýeden qoldaýǵa arnalǵan. Tikushaqtyń joıatyn negizgi nysandary qarsylastyń saýytty tehnıkasy men tiri kúshi.
Mı-8 jáne Mı-171 armııa avıatsııasynyń tikushaqtaryn desantty túsirýge jáne ony atys kezinde áýeden qoldaýǵa, atys núktelerin qurtyp, oq-dárilerdi, qarýdy, júkterdi, ónimderdi, dári-dármekterdi tasymaldaýǵa, jaý qımylyna kedergi jasaýǵa, sondaı-aq jaralylardy urys dalasynan evakýatsııalaýǵa paıdalanady.
Tótenshe jaǵdaılar mınıstrliginiń EO-145 jáne N-145 tikushaqtary tótenshe jaǵdaı bolǵan aımaqtardan zardap shekkenderdi qutqarýǵa, tabıǵı apattardyń saldaryn joıýǵa, gýmanıtarlyq júkterdi tasymaldaýǵa, izdestirý-qutqarý jumystaryna, órtterdi sóndirip, medıtsınalyq kómekti súıemeldeýge arnalǵan.
C-295 ushaǵy 9 tonnaǵa deıin júk ne tolyq qarýlanǵan 70-teı áskerı qyzmetshini tasymaldaýǵa, sondaı-aq 5000 shaqyrymǵa deıingi qashyqtyqty eńserýge qabiletti.
C-295 zamanaýı navıgatsııalyq júıemen jáne qozǵaltqyshtardyń jumysyn baqylaý júıesimen jaraqtalǵan.
L-410 — bul jeńil kóp maqsatty qos motorly transporttyq jáne jolaýshylarǵa arnalǵan ushaq, qonýǵa arnalmaǵan jerge, shóp, qar basqan alańqaılarǵa jáne ushý-qoný jolaǵy qysqa áýeaılaqtarǵa qona beredi. 19 jolaýshyny nemese 1500 shaqyrymǵa deıin 1800 keli júkti tasymaldaýǵa qabiletti.
L-39 eki oryndyq oqý-jaýyngerlik ushaǵy áýe kúshteriniń kýrsanttaryn kez kelgen aýa raıy jaǵdaıynda ushýǵa úıretýge qoldanylady. Ol áýede, qurlyqta jáne teńizde is-qımyl daǵdylaryn jattyqtyrýǵa birdeı paıdalanylady. Bul daıyndyqtyń bastapqy kezeńindegi oqý-jattyǵý ushaǵy kúndizgi jáne túngi reısterdi, áýe nysandaryn barlaýdy, jer betindegi nysandarǵa soqqy berýdi pysyqtaý úshin qoldanylady.
Tý-154 ushaǵy Qorǵanys mınıstrligi basshylyǵynyń áýedegi komandalyq pýnkti bolyp esepteledi. Áskerıler ony senimdi ári kóp fýnktsııaly áýe kóligi retinde jaqsy biledi. Negizinen ishki jáne halyqaralyq baǵyttarda tasymaldaý tapsyrmalaryn oryndaýǵa arnalǵan. Ushaq 150-den 180-ge deıin áskerı qyzmetshini 3000-nan 5000 shaqyrymǵa deıingi qashyqtyqta tasymaldaı alady. Sondaı-aq júk tasymalyna da beıimdep qoldanýǵa bolady.
A-400M — ártúrli tapsyrmalardy oryndaýǵa arnalǵan kóp maqsatty áskerı kólik. Ol áskerı tasymaldaý, medıtsınalyq evakýatsııalaý, sondaı-aq gýmanıtarlyq mıssııalardy oryndaý operatsııalaryn oryndaıdy. Onyń ishinde A-400 dep atalatyn sońǵy býyny zamanaýı tórt qozǵaltqyshpen jabdyqtalǵan. Bul áýe tehnıkasy jaraq quramyna 2024 jyldyń sońynda jetkizildi.
Sý-30SM joıǵyshtary kún saıyn bizdiń el aımaqtarynda jaýyngerlik kezekshilik atqarady. Ushaq qarý-jaraqtyń keń spektrimen jáne bort radıoelektrondyq jabdyqtardyń zamanaýı keshenimen jaraqtalǵan. Sý-30SM kóp maqsatty aýyr maıdandyq joıǵyshy kúndiz-túni ártúrli aýa-raıy jaǵdaıynda jaýyngerlik mindetterdi oryndaı alady. Ol áýe nysandaryn da, jerdegi kedergini de joıa alady. Basqarylatyn zymyranmen, avıatsııalyq qarýmen jasaqtalǵan, 1,5 (bir jarym) kelige deıingi kalıbrli bombalar, zeńbirek pen zamanaýı navıgatsııa júıesi bar.
Sý-25 áskerı shabýyl ushaǵy qurlyq áskerin áýeden qoldaý úshin, kúndiz-túni urys dalasynda nysana naqty kóringende tikeleı qoldanýǵa, sondaı-aq kez kelgen meteojaǵdaıda táýlik boıy berilgen koordınattary bar obektilerdi joıýǵa arnalǵan. Sý-25 ushaǵyn osy sıpattaryna qaraı «qanatty tank» dep te ataıdy.