Astanadaǵy «7 bóshke» turǵyn úı kesheniniń órtke osal materıaly qashan aýystyrylady — TJM jaýaby

ASTANA. KAZINFORM — Tótenshe jaǵdaılar mınıstrligi Órtke qarsy qyzmet komıtetiniń bas mamany Aspandııar Saparǵalıev Astanadaǵy «7 bóshke» turǵyn úı keshenindegi órttiń sebepteri týraly pikir bildirdi.

Órtke qarsy maýsymynyń barysy týraly baspasóz máslıhatynda BAQ ókili atalǵan úıde nege qaıta-qaıta órt shyǵatynyn suraǵan.

— «Sem bochek» turǵyn úıin salǵan kezde alıýkobond materıaly qoldanylǵan. Bul ózi eski tehnologııanyń materıaly. 2009 jyly qoldanystan alyp tastaǵanbyz. Eger bul úıdiń jobasyna qandaı da bir ózgeris engiziletin bolsa, alıýkobond materıaly tolyǵymen aýystyrylýy kerek. Al jobaǵa qandaı da bir ózgeris engizilmese, aýystyrylmaıdy, — degen ekiushty jaýap aıtty Aspandııar Saparǵalıev.

«Ondaı ózgeristi sizder talap etpeseńizder kim engizedi» dep surady jýrnalıst.

TJM ókili mundaı órtke osal nysandardyń kemshiligi joıý týraly ákimdikterge jyl saıyn hat jiberetinin, biraq keıbir organdar ol talaptardy oryndaýǵa asyqpaıtynyn aıtady.

— Biz óz tarapymyzdan jylda hat jazamyz. Ár óńirde tótenshe jaǵdaılar departamenti bar. Eski talaptarmen salynyp ketken ǵımarat bolsa, árdaıym hat jazamyz. Kóptegen jumys isteldi. Ózgertkender de bar, qarajat jetpeýine baılanysty kelesi jylǵa qaldyryp júrgende de bar. Naqty «Sem bochek» nysany boıynsha Astana ákimdigine qashan hat jibergenimizdi qazir naqty aıta almaımyn, — dedi komıtet mamany.

Eske salsaq, 4 maýsym kúni elordadaǵy «7 bóshke» turǵyn úıinen órt shyǵyp, turǵyndary qaýipsiz jerge kóshirilgen bolatyn.