Astanada jyl sońyna deıin 7 óndiristik kásiporyn ashylady

ASTANA. QazAqparat - 2018 jyldyń sońyna deıin Astanada 8,7 mlrd teńge somasyna jeti jańa óndiristik kásiporyn ashylady dep josparlanǵan. Bul týraly qalalyq qoǵamdyq tyńdaýlar barysynda elordanyń 2019-2021 jyldarǵa arnalǵan bıýdjetin qarastyrý kezinde elordanyń Strategııalyq jáne bıýdjettik josparlaý basqarmasynyń basshysy Rasýl Orazǵulov málim etti, dep habarlaıdy QazAqparat Elorda Info saıtyna silteme jasap.

​«№1 Indýstrıaldyq parktiń aýmaǵy 95% ınvestıtsııalyq jobalarmen toltyrylǵan. Qalǵan 22 gektar jer 2020 jyldyń sońyna deıin ıgeriledi. №2 Indýstrıaldyq parkte óndiristik kásiporyndardy ornalastyrý boıynsha jumystar júrgizilip jatyr», - dep málim etti Rasýl Orazǵulov.

Ol sondaı-aq №2 Indýstrıaldyq parktiń aýmaǵynda 500 mlrd teńge somasyna 150 ınvestıtsııalyq joba iske asyrylatynyn atap ótti.

«Barlyq 7 kásiporyn ​№1 Indýstrıaldyq park aýmaǵyndaǵy Arnaıy ekonomıkalyq aımaqta ornalasqan. Shamamen 500-ge jýyq jańa jumys orny ashylatyny kózdelgen», - dedi qoǵamdyq tyńdaýlar barysynda Astana qalasynyń Investıtsııalar jáne kásipkerlikti damytý basqarmasy basshysynyń orynbasary Erlan Bekmurzaev.

Onyń aıtýynsha, jańadan ashylatyn ónerkásip oshaqtarynyń barlyǵy ınnovatsııalyq bolady.

«Bir kásiporyndy Memleket basshysynyń qatysýymen jeltoqsan aıynda ótetin Indýstrıalandyrý kúninde tanystyrýdy josparlap otyrmyz. Ol tsıfrlandyrýdy damytý sheńberinde jumys isteıtin modem, modýl shyǵarýmen aınalysatyn «Digital system servis» kásiporyny. Ol - sheteldik ınvestordyń qatysýymen ashylatyn qazaqstandyq kásiporyn», - dedi Erlan Bekmurzaev.